पिंपरी-चिंचवडमध्ये भाजपपुढे नाराजांची डोकेदुखी

विधानसभा निवडणुकीच्या मतदानासाठी दोन दिवसांचा कालावधी बाकी असतानाच पिंपरी-चिंचवड भाजपमधील अंतर्गत खदखद बाहेर येत आहे. स्थानिक पक्ष नेतृत्व आणि आमदारांवर आरोप करत पक्षाच्या 12 माजी नगरसेवकांनी आतापर्यंत भाजपला सोडचिठ्ठी दिली आहे. त्यात सर्वाधिक आठ माजी नगरसेवक भोसरीतील आहेत. आणखी काही माजी नगरसेवक पक्ष सोडण्याच्या वाटेवर असल्याचे सांगितले जाते. पक्षांतरामुळे भाजपच्या अडचणींत भर पडली आहे. त्यामुळे या नाराजीचा भाजपला निवडणुकीत मोठा फटका बसण्याची शक्यता व्यक्त केली जात आहे.

शहरातील उपमुख्यमंत्री अजित पवार यांच्या नेतृत्वाखाली 15 वर्षांची राष्ट्रवादी काँग्रेसची सत्ता 2017 मध्ये भाजपने उलथवून टाकली. दिवंगत आमदार लक्ष्मण जगताप, आमदार महेश लांडगे, माजी महापौर आझम पानसरे यांनी अजित पवारांची साथ सोडून कमळ हाती घेतले. महापालिकेवर प्रथमच कमळ फुलले. काहींना पदे दिली. तरी काहींना आश्वासन देऊनही दिली नाहीत त्यामुळे. नाराज माजी नगरसेवकांनी भाजपची साथ सोडण्यास सुरुवात केली आहे.

भाजपच्या आतापर्यंत 12 माजी नगरसेवकांनी पक्षांतर केले आहे. त्यात चिंचवडमधील माया बारणे, अंबरनाथ कांबळे, तुषार कामठे, चंदा लोखंडे या चार जणांचा समावेश असून, भोसरीतील सर्वाधिक आठ नगरसेवकांनी भाजपला सोडचिठ्ठी दिली आहे. त्यामध्ये वसंत बोराटे, संजय नेवाळे, लक्ष्मण सस्ते, प्रियांका बारसे, भीमाबाई फुगे, सारिका लांडगे, रवी लांडगे, एकनाथ पवार अशा आठ जणांनी भाजपला रामराम ठोकला. त्यातील रवी लांडगे आणि पवार यांनी शिवसेना (उद्धव बाळासाहेब ठाकरे) पक्षात प्रवेश केला आहे. उर्वरित माजी नगरसेवकांनी राष्ट्रवादी काँग्रेस शरदचंद्र पवार पक्षात प्रवेश केला आहे.

सक्षम असताना पदांपासून आमदारांनी डावलले, सातत्याने अन्याय केला, विकासकामे रोखली, आम्ही केलेल्या पाठपुराव्याने झालेल्या कामांचे श्रेय घेतले जाते. दादागिरी सहन करावी लागते, अशा तक्रारी करून या माजी नगरसेवकांनी पक्ष सोडला आहे.