पुण्यात पतीकडून पत्नीचा निर्घृण खून:चारित्र्याच्या संशयावरून ओढणीने गळा आवळला; आरोपी पतीला अटक

सिंहगड रस्ता परिसरातील नऱ्हे येथे पतीने पत्नीच्या चारित्र्यावर संशय घेऊन तिचा खून केल्याची धक्कादायक घटना घडली आहे. पोलिसांनी आरोपी पतीला अटक केली असून, मृत महिलेची ओळख रेश्मा भिकू खुडे (वय ३२) अशी झाली आहे. पोलिसांकडून मिळालेल्या माहितीनुसार, रेश्मा यांचा पहिला विवाह झाला होता, मात्र पतीसोबत जमत नसल्याने त्यांनी कुमार कलगोंडा पाटील (वय ४२) यांच्याशी दुसरा विवाह केला. पहिल्या विवाहातून त्यांना दोन मुले होती. महिनाभरापूर्वी त्या कुमारसोबत नऱ्हे भागात राहण्यास आल्या होत्या. घटनेच्या दिवशी कामावरून घरी आल्यानंतर कुमारने रेश्मा यांच्याशी वाद घातला. कुमार नेहमीच रेश्मा यांच्या चारित्र्यावर संशय घेत असे. त्याच कारणावरून त्यांच्यात वाद झाला आणि रागाच्या भरात कुमारने रेश्मा यांचा ओढणीने गळा आवळून खून केला. घटनेची माहिती मिळताच सिंहगड रस्ता पोलिसांनी तात्काळ घटनास्थळी धाव घेतली आणि आरोपी कुमार पाटील याला ताब्यात घेतले. सध्या पोलीस उपनिरीक्षक सागर पवार यांच्या नेतृत्वाखाली पुढील तपास सुरू आहे. उत्पादन शुल्क विभागाच्या अधिकाऱ्यावर हल्ला पुणे जिल्ह्यातील भावडी गावात उत्पादन शुल्क विभागाच्या अधिकाऱ्यावर हल्ल्याची धक्कादायक घटना घडली. दुय्यम निरीक्षक विशाल कदम (वय ३०) यांच्या फिर्यादीवरून वाघोली पोलिसांनी जीवन साठे आणि त्याच्या साथीदाराविरुद्ध गुन्हा दाखल केला आहे. घटनेची माहिती अशी की, नगर रस्त्यावरील भावडी गावात गावठी दारूची अवैध वाहतूक होत असल्याची माहिती मिळताच दुय्यम निरीक्षक कदम यांनी कारवाईसाठी टेम्पो अडवला. याच दरम्यान पाठीमागून येणाऱ्या एका कारने त्यांच्या दुचाकीला जाणीवपूर्वक धडक दिली. या धडकेत कदम रस्त्यावर पडले आणि या संधीचा फायदा घेत टेम्पोचालक गावठी दारूसह पसार झाला. अंधाराचा फायदा घेत कारचालकही पळून गेला.पोलीस उपनिरीक्षक वैजनाथ केदार यांच्या नेतृत्वाखाली पोलीस पथक आरोपींचा शोध घेत असून पुढील तपास सुरू आहे. या घटनेमुळे अवैध दारू माफियांच्या वाढत्या धाडसाबद्दल चिंता व्यक्त केली जात आहे.