बाटेंगे और जितेंगे… हा भाजपचा नोट जिहाद, उद्धव ठाकरे यांचा घणाघात

भारतीय जनता पक्षाचे सरचिटणीस विनोद तावडे यांनी विरारमध्ये पैसे वाटल्याचा आरोप बहुजन विकास आघाडीने केला आहे. जोपर्यंत विनोद तावडेंवर कारवाई होत नाही तोपर्यंत त्यांना सोडणार नसल्याची भूमिका बहुजन विकास आघाडीकडून घेण्यात आली होती. यावर प्रतिक्रीया देताना शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांनी ‘हा भाजपचा नोट जिहाद आहे. सध्या भाजपचे बटेंगे तो कटेंगे नाही तर बाटेंगे तो जितेंगे सुरू आहे’, असा घणाघात केला.

उद्धव ठाकरे यांनी मंगळवारी महाराष्ट्राची कुलदैवत तुळजाभवानीचे दर्शन घेतले. तुळजाभवानीचे दर्शन घेऊन मुंबईत परतल्यानंतर पत्रकारांशी बोलताना उद्धव ठाकरे यांनी भाजपवर जोरदार टीका केली. ”विनोद तावडेंचा व्हिडीओ निवडणूक आयोगाने बघायला पाहिजे. आज देखील माझी बॅग तपासली. निवडणूक आयोगाने यावर कारवाई केली पाहिजे नाहीतर निवडणूक आयोगावर कारवाई करण्यासाठी आम्हाला काहीतरी वेगळा मार्ग बघावा लागेल”, असे उद्धव ठाकरे म्हणाले.