बिबट्याच्या हल्ल्यात दुचाकीवरील वृद्धा जखमी:न्यू हायस्कूल नागमठाण येथील भयंकर प्रकार

वैजापूर तालुक्यातील गोदावरी पट्ट्यात मागील काही दिवसांपासून बिबट्याने चांगलाच धुमाकूळ घातला असून शेतशिवारात बिबट्याचा मुक्त संचार सध्या निदर्शनास येत आहे. गुरुवारी सायंकाळी सातच्या सुमारास न्यू हायस्कूल नागमठाण येथे वैजापूरहून हमरापूरकडे दुचाकीवर जाताना एका वृद्धेवर बिबट्याने हल्ला करून जखमी केले. या घटनेमुळे परिसरात भीतीचे वातावरण आहे. काही दिवसांपूर्वीच बिबट्याने चांदेगाव शिवारात बकरीचा व कुत्र्याचा फडशा पाडल्याची घटना ताजी असताना गुरुवारी (२१ नोव्हेंबर) संध्याकाळी चांदेगाव येथील शेतकरी भगवान रायभान काळे यांच्या गावालगत शेत वस्तीवर असलेल्या गट नंबर ९३ शेतवस्तीवरून दुचाकीवर शेतात पाणी भरण्यासाठी जात असताना रस्त्याच्या कडेला दडून बसलेल्या बिबट्याने भगवान रायभान काळे यांच्यावर झेप घेऊन प्राणघातक हल्ला केला. त्यांच्या अंगावरचे स्वेटर व पँट फाटून त्यांना बिबट्याचे तीन दात लागले आहेत. त्यानंतर त्यांना खासगी दवाखान्यात नेण्यात आले. गुरुवारी (२८ नोव्हेंबर) सायंकाळी सातच्या सुमारास न्यू हायस्कूल नागमठाण येथे वैजापूरहून हमरापूरकडे दुचाकीवर जात असताना सत्यभामा बाळू पठारे (६०) यांच्यावर बिबट्याने प्राणघातक हल्ला केला. बिबट्याच्या हल्ल्यात महिला जखमी झाली आहे. या परिसरात आठवड्यात दुसरी घटना झाल्यामुळे परिसरात भीतीचे वातावरण आहे. बिबट्यास जेरबंद करण्याची मागणी वारंवार शेतकऱ्याकडून केली जात असून यावर मात्र वन विभाग कुठलीही कारवाई करत नाही. शेतशिवारात, शेतवस्त्यांवर बिबट्या वारंवार दिसत असल्याने परिसरातील शेतकरी धास्तावले असून शेतात जाण्यासाठीही शेतकऱ्यांना भीती वाटत आहे.