बीडमध्ये दोन कारचा भीषण अपघात, दोघे जागीच ठार तर एक गंभीर जखमी

बीड जिल्ह्यात केज तालुक्यातील चंदनसावरगाव जवळ शुक्रवारी रात्री दोन कारचा भीषण अपघात झाला. या अपघातात दोघे जण जागीच ठार झाले असून एकाची प्रकृती गंभीर आहे. अपघाताची माहिती मिळताच युसुफवडगाव पोलिसांनी तात्काळ घटनास्थळी धाव घेत मदतकार्य सुरू केले. जखमीला उपचारासाठी रुग्णालयात दाखल केले.

केज-अंबेजोगाई रोडवरील चंदनसावरगावच्या हद्दीतील नायरा पेट्रोलपंपाजवळ दोन स्विफ्ट कारची समोरासमोर धडक झाली. धडक इतकी जोरदार होती की आवाजाने आसपासच्या परिसरातील गावकरी धावत आले. मृत आणि जखमींची अद्याप ओळख पटली नाही.

युसुफवडगाव पोलीस ठाण्याचे प्रभारी अधिकारी सहाय्यक पोलीस निरीक्षक मच्छिंद्रनाथ शेंडगे यांना घटनेची माहिती मिळताच त्यांच्या आदेशाने बीट अंमलदार शेंडगे, हेडकॉन्स्टेबल पठाण, हेडकॉन्स्टेबल वारे आणि वाहन चालक हनुमंत गायकवाड हे अपघातस्थळी पोहोचले. पोलिसांनी मृतदेह बाहेर काढून जखमीला सरकारी दवाखान्यात हलवले.