भाजपवाले महाराष्ट्राला खरेदी करायला निघालेत:पण महाराष्ट्र शिवरायांचा स्वाभिमान जपणारा; जयंत पाटील यांचा महायुतीवर हल्लाबोल

देशातील आणि महाराष्ट्रातील निवडणुकीमध्ये भाजप काय करते हे विरारमधील प्रकरणामुळे जनतेला समजले, असे म्हणत विरारमधील प्रकरणावरून राष्ट्रवादी काँग्रेस शरद पवार गटाचे प्रदेशाध्यक्ष जयंत पाटील यांनी भाजपवर टीका केली आहे. जयंत पाटील पुढे बोलताना म्हणाले की, 23 तारखेला कळेल की महाराष्ट्र हा छत्रपती शिवाजी महाराज यांचा स्वाभिमान जपणारा महाराष्ट्र आहे. भाजपचा राष्ट्रीय नेता पैशांसोबत सापडतो यावरून सिद्ध होते की भाजप या निवडणुकीत काय करत आहे. हे महाराष्ट्राला खरेदी करायला निघाले आहेत, महाराष्ट्र स्वाभिमानी आहे, महाराष्ट्र विकणार नाही. नेमके जयंत पाटलांचे वक्तव्य काय? जयंत पाटील म्हणाले की, आजची निवडणूक महाराष्ट्रातील शेतकरी, युवक, महिलांसाठी व महाराष्ट्राच्या भवितव्यासाठी अत्यंत महत्वाची आहे. आपला महाराष्ट्र धर्म हा संपूर्ण भारताला एक दिशा देतो आणि त्याच धर्माचे रक्षण करण्याची जबाबदारी आपल्या सर्वांवर आहे. म्हणूनच आपण सर्वांनी या अत्यंत निर्णायक व महत्वाच्या निवडणुकीत मतदानाचा हक्क बजावावा आणि महाराष्ट्राला योग्य दिशा देण्याचे काम करावे. रामकृष्ण हरी, असे ट्विट जयंत पाटलांनी केले आहे. ..म्हणून सुप्रियाताईंची ऑडिओ क्लिप व्हायरल जयंत पाटील म्हणाले की, खोटे नाटक उभा करणे हे भारतीय जनता पार्टीचे वैशिष्ट्य आहे. भारतीय जनता पक्षाचे राष्ट्रीय सरचिटणीस विनोद तावडे यांना विरार येथे पैशांसह पकडण्यात आले आणि देशभरात एकच खळबळ माजली. ही खळबळ थांबवण्यासाठी सुप्रियाताईंच्या ऑडिओ क्लिपचे कुंबाड रचले गेले. लोकांना भाजपला ओळखले आहे हा पक्ष खोटा बोलणाराही आहे आणि पक्ष फोडणाराही आहे. भाजपचे लोक असे वागतात हे दुर्दैवी असल्याचे ते म्हणाले.