मराठा समाजासह दलित, मुस्लिम, ओबीसी आपल्यासोबत- जरांगे:भुजबळ व जरांगे पाटील यांच्या 300 मीटरवर सभा

मराठा समाजासह दलित, मुस्लिम, ओबीसी आपल्या सोबत आहे. मतदान करताना मुलाबाळांचा चेहरा समोर ठेवून मतदान करा असे आवाहन जरांजे यांनी केले. मराठा आंदोलक मनोज जरांगे यांची लासलगावी जेथे सभा होती तेथून फक्त ३०० मीटरवर मंत्री छगन भुजबळ यांची सभा झाल्याने पोलिसांवर मोठ्या प्रमाणात दडपण होते. लासलगाव शहरात मनोज जरांगे यांचे रात्री साडेनऊ वाजता जल्लोषात स्वागत करण्यात आले. पहिल्यांदाच दोघांच्या सभा एकाच ठिकाणी सुरू असल्याने मोठा पोलिस बंदोबस्त तैनात करण्यात आला होता. कुठलाही अनुचित प्रकार न घडता भुजबळ आणि जरांगे आपापल्या दिशेने मार्गस्थ झाले. साडेचार वाजता मनोज जरांगे यांचे आगमन लासलगाव शहरात होणार होते. मात्र, ठिकठिकाणी होणारे स्वागत आणि सत्कारामुळे त्यांना लासलगावी येण्यास चार तास उशीर झाला. जरांगे आणि भुजबळ या दोघांची सभा एकाच दिवशी एकावेळी लासलगावमध्ये झाल्याने पोलिस यंत्रणेला मोठी कसरत करावी लागली. मनोज जरांगे यांची सभा डॉ. बाबासाहेब आंबेडकर पुतळ्यासमोर मुख्य रस्त्यावर झाली. यावेळी रस्त्याच्या दुतर्फा मराठा समाजाची गर्दी दिसत होती. यावेळी मोठ्या प्रमाणात वाहतूक कोंडी झाली होती. छगन भुजबळ यांची सभा संपल्यानंतर ते अन्य मार्गाने येवल्याकडे रवाना झाले. मराठा आंदोलक मनोज जरांगे यांच्या स्वागतासाठी परिसरातील अनेक गावांमधील मराठा युवक व युवती मोठ्या संख्येने आले होते.