मालेगावात 4 हजार बांगलादेशींना बनावट जन्म प्रमाणपत्र:किरीट सोमय्या यांचा गंभीर आरोप, फसवणूक प्रकरणी तिघांना अटक

मालेगावमध्ये मोठ्या प्रमाणात बांगलादेशींना जन्म दाखला दिल्याचा दावा भाजप नेते किरीट सोमय्या यांनी केला होता. त्यांनी काही दिवसांपूर्वी मालेगावातील प्रशासकीय अधिकाऱ्यांची भेट घेत या जन्म दाखल्यांची चौकशी करण्याची मागणी केली होती. यानंतर मालेगावातील तिघांनी खोटी कागदपत्रे सादर जन्म दाखल मिळवल्याचे सिद्ध झाले. या तिघांविरोधात पोलिसांत गुन्हा दाखल करण्यात आला असून त्यांना अटक केल्याची माहिती किरीट सोमय्या यांनी दिली आहे. भाजप नेते किरीट सोमय्या यांनी बनावट कागदपत्रांच्या आधारे भारतात वास्तव्य करणाऱ्या बांगलादेशींविरोधात रान पेटवले आहे. नाशिक जिल्ह्यातील मालेगाव हे बांगलादेशी रोहिंग्या मुसलमानांना भारतीय करण्याचा अड्डा असल्याचा गंभीर आरोप त्यांनी केला होता. या पार्श्वभूमीवर किरीट सोमय्या यांनी शुक्रवारी पुन्हा एकदा मालेगाव दौऱ्यावर आले होते. अधिकाऱ्यांशी चर्चा केल्यानंतर तिघांवर गुन्हा दाखल झाल्याची माहिती त्यांनी आज सोशल मीडिया एक्सद्वारे दिली. मालेगावातील 3 हजार 977 जणांची चौकशी होणार सय्यद साजिद, शबाना बानो, नजमा बानो अशी तिघांची नावे आहेत. या तिघांना जन्म प्रमाणपत्रासाठी खोटे कागदपत्र, फसवणूक केल्याचे निष्पन्न झाल्यानंतर त्यांना अटक करण्यात आली असून 4 फेब्रुवारीपर्यंत पोलिस कोठडीत ठेवण्यात येणार आहे. माझ्या तक्रारी वरून 3 हजार 977 अर्जदारांची चौकशी होणार असल्याचे किराट सोमय्या यांनी सांगितले. सोमय्यांची अधिकाऱ्यांशी बंद दाराआड चर्चा दरम्यान, किरीट सोमय्या यांनी शुक्रवारी मालेगावात येत छावणी पोलीस ठाणे, महापालिका व धान्य पुरवठा कार्यालयाला भेट दिली होती. या भेटीत त्यांची छावणी पोलिस ठाण्यात अधिकाऱ्यांशी बंद दाराआड चर्चा झाली होती त्यानंतर माध्यमांशी संवाद साधताना, पंधरवड्यापूर्वी जन्म प्रमाणपत्र दाखल करणाऱ्या 100 संशयितांच्या नावांची यादी पुराव्यासह पोलिसांना देऊन लेखी तक्रार दिली होती. त्याआधारे झालेल्या चौकशीत तिघांकडे भारतीय नागरिकत्व तसेच शहरात वास्तव्याचा कोणताही पुरावा आढळून आला नाही. त्यानुसार सय्यद साजिद वाहब, शबाना बानो शेख हनिफ, नजमाबानो अब्दुल शारुर या तिघांवर गुन्हा दाखल झाला आहे, असे ते म्हणाले होते. राष्ट्र सुरक्षेला प्राधान्य दुसरीकडे, मालेगाव मध्यचे माजी आमदार आसिफ शेख व समाजवादी पक्षाचे मुस्तकीम डिग्नेटी यांच्याकडून किरीट सोमय्यांना विरोध केला जात आहे. यासाठी 'मॉयनॉरीटी डिफेन्स कमिटी'ची स्थापना देखील करण्यात आली. किरीट सोमय्या यांच्या मालेगावातील दौऱ्याच्या पार्श्वभूमीवर, 'मायनॉरिटी डिफेन्स कमिटी'च्या वतीने शहरातील गांधी पुतळ्यावर 'किरीट सोमय्या गो बॅक'चे फलक घेत व काळ्या फिती लावून निदर्शने करण्यात आली होती. यावर बोलताना देशाच्या सुरक्षेला आमचे प्राधान्य आहे. विरोधकांना देशाची सुरक्षा महत्त्वाची नाही. व्होट जिहाद त्यांना महत्त्वाचे वाटते. त्यामुळे कोण काय बोलत आहे, याकडे मी लक्ष देत नाही, असे सोमय्या म्हणाले होते.