मुलाला दुचाकीचा धक्का लागल्याने आंबेडकरनगरात दोन कुटुंबांत राडा:घरात घुसून महिलेसह तीन मुलांना रॉडने मारहाण, सहा जणांवर गुन्हा

घरासमोरून जाणाऱ्या दुचाकीचा मुलाला धक्का लागल्याने दोन कुटुंबांत आंबेडकरनगरात तुफान राडा झाला. यात मकळे कुटुंबाने शिंदे कुटुंबाच्या घरात घुसून महिलेसह तीन मुलांना रॉडने मारहाण केली. ही घटना २३ नोव्हेंबर रोजी रात्री साडेसात वाजता घडली. याप्रकरणी महिलेच्या फिर्यादीवरून सहा जणांवर सिडको पोलिस ठाण्यात गुन्हा दाखल करण्यात आला आहे. बादल कल्याण मकळे, आनंद मकळे, लक्ष्मण मोकळे, अनिल मारुती मकळे, अजय मच्छिंद्र मकळे, विजय मच्छिंद्र मकळे (सर्व रा. आंबेडकरनगर) अशी आरोपींची नावे आहेत. बादल मकळे हा रिक्षाचालक आहे. २३ नोव्हेंबर रोजी बादल मकळे गल्लीतून दुचाकी घेऊन जात होता. त्याच्या दुचाकीचा धक्का फिर्यादीच्या मुलाला लागला. त्यामुळे फिर्यादीने "आपल्या गल्लीतील रोड नवीन झाला आहे. त्यामुळे तू गाडी हळू चालव. माझ्या मुलाला तुझ्या गाडीचे हँडल लागले' असे समजावून सांगितले. त्यावर बादल मकळे "आता गडबडीत आहे. सायंकाळी तुला बघतो' अशी धमकी देत निघून गेला. सायंकाळी साडेसात वाजेच्या सुमारास बादल मकळे याच्यासह सहा जण फिर्यादीच्या घरात घुसले. त्या वेळी घरात फिर्यादीसह तिची तीन मुले व सासू होती. घरात घुसून "रोड का तुझ्या बापाचा आहे का?'असे म्हणत सर्वांनी फिर्यादीसह त्याच्या मुलांना शिवीगाळ करून मारहाण केली. याप्रकरणी सिडको पोलिस ठाण्यात गुन्हा दाखल केला आहे. पुढील तपास गोरे करीत आहेत.