राज्यात महायुती सरकार आल्याने नाशिक-पुणे रेल्वेच्या आशा पल्लवित

नाशिक- नगर- पुणे या तीन जिल्ह्यांच्या विकासात भर पाडणाऱ्या २३२ किलोमीटरच्या सेमीहायस्पीड रेल्वे प्रकल्प प्रस्तावित आहे. या रेल्वेमुळे तीन्ही जिल्ह्यांमधील कृषी व औद्योगीक विकासालादेखील चालना मिळणार आहे. मात्र, चालू वर्षाच्या प्रारंभी प्रस्तावित नाशिक-सिन्नर-संगमनेर-नारायणगाव-पुणे या मार्गात बदल करण्याचा घाट राज्य सरकारकडून घालण्यात आला होता. तसेच नव्याने नाशिक- सिन्नर- शिर्डी- पुणे असा हा मार्ग नेण्याची तयारी शासनाने केली. मात्र, शासनाच्या या निर्णयावर तीन्ही जिल्ह्यांमधून तीव्र नाराजीचा सूर उमटत हाेता. दरम्यानच्या काळात विधानसभा निवडणुकीच्या प्रचारादरम्यान उपमुख्यमंत्री देवेंद्र फडणवीस यांनी सत्तेत आल्यास नाशिक-पुणे सेमी हायस्पीड रेल्वेला गती देण्याचे घोषणा केली. तसेच पहिलेचाच नाशिक-संगमेनर-पुणे असा मार्ग ठेवण्याचे आश्वासनही दिले होते. राज्यात महायुतीचे सरकार स्थापन हाेणार हे निश्चित झाले आहे. त्यामुळे उपमुख्यमंत्री फडणवीस यांनी सेमी हायस्पीड रेल्वेबाबत दिलेल्या आश्वासनाची तातडीने पूर्ती करावी, अशी अपेक्षा तीन्ही जिल्ह्यांमधील जनतेकडून व्यक्त केली जात आहे.

बहुचर्चित नाशिक- पुणे रेल्वे मार्गामध्ये राजकीयदृष्ट्या संगमनेर अडचणी ठरत होते. प्रस्तावित रेल्वे मार्गामुळे संगमनेरच्या सर्वांगिण विकासात झपाट्याने वाढ होणार आहे. त्याचे श्रेय विरोधकांच्या पारड्यात जाण्याची शक्यता अधिक होती. त्यामुळे शासनाने प्रस्तावित मार्गात बदल करण्याचा घाट घातल्याची चर्चा होती. परंतु, विधानसभा निवडणुकीत संगमेनरवासीयांनीच बदल घडविला आहे. परिणामी, केंद्र व राज्य सरकारकडून प्रकल्पाला तातडीने मंजूरी देतानाच निधीची तरतूद केली जाण्याची शक्यता बळावली आहे.