रिना पुरी अन् प्राजक्ता मेश्रामची राज्यस्तर बॅडमिंटन स्पर्धेत निवड:बुलडाणा येथे विभागीय क्रीडा स्पर्धेत चमकदार कामगिरी

नगर विकास विभागातर्फे आयोजित तीन दिवसीय विभागीय व क्रीडा सांस्कृतिक महोत्सवात महिलांच्या एकेरी बॅडमिंटन स्पर्धेत नगर परिषद शाळेच्या शिक्षिका रिना पुरी यांनी उपविजेते पद, तर दुहेरी बॅडमिंटन स्पर्धेत पुरी यांच्यासह नगर परिषद कार्यालयात कार्यरत लेखापाल प्राजक्ता मेश्राम यांनी विजेतेपद मिळवत प्रथम क्रमांक पटकावला आहे. नगर विकास विभागाद्वारे घेण्यात आलेला तीन दिवसीय विभागीय व क्रीडा सांस्कृतिक महोत्सव नुकताच बुलडाणा येथील क्रीडा संकुलात पार पडला. या क्रीडा महोत्सवातील महिला एकेरी बॅडमिंटन स्पर्धेत शेंदुरजनाघाट येथील नगर परिषद प्राथमिक शाळा क्रमांक २ मधील सहायक शिक्षिका रिना पुरी यांनी अंतिम फेरीत धडक देत अकोला विरुद्ध उपविजेते पद पटकावले, तर महिलांच्या दुहेरी बॅडमिंटन स्पर्धेत नगर परिषद कार्यालयातील लेखापाल प्राजक्ता मेश्राम व रिना पुरी यांनी अमरावती जिल्ह्याचे प्रतिनिधित्व करत अमरावती जिल्ह्यातीलच मोर्शीच्या संघाला नमवून विजेतेपद पटकावले आहे. त्यांनी केलेल्या चमकदार कामगिरीमुळे राज्यस्तरीय स्पर्धेसाठी रिना पुरी व प्राजक्ता मेश्राम या दोघींची निवड झाली आहे. त्यांनी विभागीय स्पर्धेत मिळवलेले यश व राज्यस्तरीय स्पर्धेत मिळवलेल्या स्थानाबद्दल नगर परिषदेचे मुख्याधिकारी सिद्धार्थ मेश्राम, संगणक अभियंता अमेय वानखेडे, आरोग्य निरीक्षक रणजित सोनेकर, सहायक प्रकल्प अधिकारी विलास आठवले, बांधकाम अभियंता दया डेहणकर, दीपक दवंडे, समाधान काटे, शिक्षण लिपिक निता हमाने, शाळा क्रमांक दोनचे मुख्याध्यापक साहेबराव उईके, नगर परिषदेचे सर्व कर्मचारी, शिक्षण विभागाचे प्रशासन अधिकारी विजय बेलसरे तसेच नगर परिषद शाळांचे सर्व मुख्याध्यापक व सर्व शिक्षक वृंद यांनी दोघींचेही अभिनंदन करत व पुढे होणाऱ्या राज्यस्तरीय स्पर्धेसाठी शुभेच्छा दिल्या.