लासूरला पतंगोत्सवास 107 विद्यार्थी सहभागी:निखिल, ओम ठरले विजेते, स्पर्धेत राहुल जाधव, हरीश सावंत, प्रणवनेही मारली बाजी

गंगापूर खुलताबाद मतदारसंघाचे आमदार प्रशांत बंब यांच्या वाढदिवसानिमित्त येथील ग्रामपंचायत सदस्य गणेश व्यवहारे यांनी पतंगोत्सवाचे आयोजन केले होते. या स्पर्धेत एकूण १०७ विद्यार्थ्यांनी सहभाग नोंदवला. दरम्यान, विद्यार्थ्यांनी रंगीबेरंगी, सामाजिक संदेश लिहिलेले कागदी पतंग आकाशात उडवून आनंद लुटला. इयत्ता पहिली ते पाचवी व इयत्ता सहावी ते दहावी या दोन गटातील विद्यार्थ्यांनी स्पर्धेत भाग घेतला होता. या स्पर्धेतील विजेत्यांना रोख बक्षीस, प्रमाणपत्र व सन्मानचिन्ह देण्यात आले. या स्पर्धेचे परीक्षक म्हणून मच्छिन्द्र बडोगे, कल्पेश गायकवाड यांनी काम पाहिले. सूत्रसंचालन प्रा. शशिकांत सांगविकर, प्रास्ताविक प्रा. अशोक म्हस्के तर आभार प्रशांत दाभाडे यांनी मानले. माजी उपसरपंच गणेश व्यवहारे, कृषी उत्पन्न बाजार समिती संचालक सुरेश जाधव, ग्रामपंचायत सदस्य नारायण वाकळे, प्रकाश कोकरे, अशोक सौदागर, कल्याण पवार, शरद चव्हाण, सोनाली व्यवहारे, विजय खरोटे उपस्थित होते. कार्यक्रमाच्या यशस्वीतेसाठी नंदकिशोर बनसोड, अशोक हाडके, अमोल लंके, दिनेश व्यवहारे, योगेश व्यवहारे, सचिन गुंजकर यांनी पुढाकार घेतला. विजेत्यांचा प्रमाणपत्रांसह गौरव यामध्ये अ गटात निखिल शिंदे प्रथम, राहुल जाधव द्वितीय, हरीश सावंत तृतीय, तेजस घोडके चतुर्थ तर वंश कांबळे व ओमकार धानके यांनी प्रोत्साहनपर क्रमांक पटकावला. ब गटात ओम गायकवाड प्रथम, अबूजर पठाण द्वितीय, प्रणव सोळस तृतीय, समर्थ पवार चतुर्थ तर गौरव मोरे व अयान मन्सूरी यांनी प्रोत्साहनपर क्रमांक पटकावला. या सर्व विजेत्यांना प्रमुख पाहुणे माजी सरपंच प्रदीप भुजबळ, उद्योजक सुरेश मुनोत, वैजापूर मर्चन्ट बँकेचे संचालक प्रितमकुमार मुथा, सरपंच मिनाताई पांडव, संजय पांडव यांच्या उपस्थितीत बक्षीस वितरण करण्यात आले.