शहाजीराजे भोसले यांना कर्नाटकात अभिवादन:समाधिस्थळी शेकडो शिवभक्त झाले नतमस्तक

स्वराज्य संकल्पक शहाजीराजे भोसले यांचा पुण्यतिथी सोहळा गुरुवारी (२३ जानेवारी) होदेगेरी (कर्नाटक) येथे झाला. शेकडो शिवभक्तांनी समाधिस्थळी अभिवादन करण्यासाठी गर्दी केली होती. महाराष्ट्र राज्यासह कर्नाटक, गुजरात, तेलंगण, आंध्र प्रदेश, तामिळनाडू व केरळ येथील शिवभक्तांच्या प्रमुख उपस्थितीत हा दिमाखदार सोहळा झाला. स्वराज्य संकल्पक शहाजीराजे भोसले यांना सर्वप्रथम अभिवादन करण्यात आल्यानंतर कर्नाटक राज्याच्या लोकसंस्कृतीतील भारतनाट्याने कार्यक्रमाचा शुभारंभ झाला. नंतर पराक्रम, युद्धप्रसंगाची बुद्धिमत्ता, उत्तम प्रशासन, स्वतंत्र राज्यकारभार या गुणांचे शिवरायांमध्ये बीजारोपण करणारे, अनंत संकटांवर मात करत छत्रपती शिवाजी महाराजांना घडवणारे स्वराज्य संकल्पक, महाबली, महापराक्रमी शहाजीराजे भोसले यांच्या कार्यकर्तृत्वाचे स्मरण शिवभक्तांकडून करण्यात आले. शहाजीराजे भोसले यांचे कर्नाटक राज्यातील होदेगेरी येथील समाधिस्थळ उघड्यावर असल्याने शिवप्रेमींनी नाराजी व्यक्त केली. लवकरात लवकर समाधिस्थळाचा विकास करण्यात येईल, अशी ग्वाही स्वराज्य संकल्पक शहाजीराजे भोसले प्रतिष्ठानचे अध्यक्ष राजेंद्र पवार यांनी दिली. शिवभक्तांनी महाप्रसाद घेतल्यानंतर कार्यक्रमाचा समारोप झाला.