शाब्बास मनोजदादा... मैदान मारावे तर असे

सातारा : कराड उत्तरच्या रणांगणात कसलेल्या पैलवानाला चितपट करून एकदाची कुस्ती जिंकलीत. शाब्बास मनोजदादा..., मैदान मारावे तर असे तुमच्यारखे, चांगल्या मताधिक्याने, अशा शब्दात भाजपचे नेते व माजी उपमुख्यमंत्री देवेंद्र फडणवीस यांनी नवनियुक्त आमदार मनोजदादा घोरपडे यांचे मुंबईत कौतुक केले. कराड उत्तर विधानसभा मतदारसंघात विजयश्री खेचून आणल्यानंतर आ. मनोज घोरपडे यांनी मुंबई येथे सागर बंगल्यावर जाऊन आ. देवेंद्र फडणवीस यांची भेट घेतली. यावेळी त्यांचे बंधू संग्राम घोरपडे सोबत होते.

आ. मनोजदादा घोरपडे यांनी कराड उत्तर विधानसभा मतदारसंघामध्ये तब्बल 1 हजार कोटी रुपये विकासकामांसाठी आणले होते. आमदार नसतानाही त्यांनी केलेल्या विकासकामांमुळे येथील जनतेने त्यांच्यावर विश्वास दाखवत त्यांना भरभरुन मते दिली. तब्बल तीन विधानसभा निवडणुका सातत्याने लढत मनोजदादांनी आपले स्कोअर कार्ड उंचावत ठेवले होते. यासोबतच भाजपच्या माध्यमातून शेतीच्या पाण्यासाठी त्यांनी जीवाचे रान केले. तब्बल 25 वर्षांपेक्षा जास्त एकाच कुटुंबाकडे कराड उत्तर मतदारसंघाची सत्ता होती. ही सत्ता उलथवून टाकण्यामध्ये यंदा मनोजदादांना यश आलेे. मनोजदादांनी माजी सहकार मंत्री बाळासाहेब पाटील यांचा पराभव केला असल्याने त्यांच्या यशाचे देवेंद्र फडणवीस यांनी कौतुक केले आहे.

आ. मनोजदादांनी सागर बंगल्यावर जावून देवेंद्र फडणवीस यांची भेट घेतली. आ. फडणवीस यांनी त्यांचे दिलसे स्वागत केले. तुम्ही जायंट किलर तर ठरलाच मात्र, बलाढ्य नेत्याचा पराभव केला, तुमचे खूप खूप अभिनंदन. यापुढेही आपल्याला बळ देवू. जनतेसाठी लढत आला आहात, आता जनतेने तुमच्यावर विश्वास दाखवला आहे. तो सार्थ करण्यासाठी राज्य व केंद्र शासनाच्या माध्यमातून जी काही ताकद द्यायची, ती आम्ही निश्चितपणे देवू. मतदारसंघातील पाण्याचा प्रश्न सोडवला जाईल. तसेच जनतेच्या ज्या काही मागण्या आहेत, त्या पूर्ण करण्यासाठी असेच झटत रहा, असेही आ. देवेंद्र फडणवीस म्हणाले.