शिक्षण संस्थांनी बदलत्या आव्हानांना सामोरे गेले पाहिजे:बार्शीमधील समता दिनानिमित्तच्या कार्यक्रमात डॉ. अशोक चौसाळकर यांचे प्रतिपादन

महाराष्ट्रापुढे गंभीर प्रश्न आहेत. कर्मवीरांसारख्या ध्येयवाद्यांच्या त्यागातून निर्माण झालेल्या शिक्षण संस्थांनी बदलत्या आव्हानांना सामोरे जाण्याचे सामर्थ्य विद्यार्थ्यांमध्ये, समाजात निर्माण केले पाहिजे, असे प्रतिपादन ज्येष्ठ राजकीय विश्लेषक, अभ्यासक डॉ. अशोक चौसाळकर (कोल्हापूर) यांनी केले. ज्येष्ठ साहित्यिक बाबा भांड अध्यक्षस्थानी होते. या वेळी बार्शीचे आमदार दिलीप सोपल, माजी आमदार राजेंद्र राऊत, संस्थाध्यक्ष डॉ. बी वाय यादव, उपाध्यक्ष नंदकुमार जगदाळे, सचिव पी. टी. पाटील, सहसचिव अरुण देबडवार, खजिनदार जयकुमार शितोळे, शिवशक्ती बँकेचे चेअरमन डॉ. प्रकाश बुरगुटे, डॉ. गुलाबराव पाटील आदी व्यासपीठावर होते. श्री शिवाजी शिक्षण प्रसारक मंडळाचे संस्थापक कर्मवीर डॉ. मामासाहेब जगदाळे यांच्या जयंतीनिमित्त आयोजित समाज दिन सोहळ्यात डॉ. चौसाळकर बोलत होते. स्वागतपर भाषणात डॉ. बी वाय यादव यांनी कर्मवीरांचे शिक्षण व आरोग्य सेवेचे स्वप्न साकारत असल्याचे सांगत संस्थेच्या माझा वाढदिवस माझी संस्था या उपक्रमांतर्गत ३७ लाख रुपये जमा झाल्याचे सांगितले. प्रास्ताविकामध्ये नंदकुमार जगदाळे यांनी कर्मवीर जयंती सोहळा लोकोत्सव झाला असल्याचे सांगितले. अहवाल वाचनामध्ये सचिव पी. टी. पाटील यांनी केले. या वेळी बाबा भांड म्हणाले, बडोद्याच्या सयाजीराव गायकवाड यांचे राज्याच्या शिक्षण प्रसारात मोठे योगदान आहे. गायकवाड यांनी १०० वर्षांपूर्वी ८९ कोटींच्या शिष्यवृत्ती वाटल्या. व नव्या शिक्षण संस्थांना प्रोत्साहन दिले. महाराष्ट्र व गुजरात राज्य एकत्र असते तर गायकवाड यांचे नाव अग्रभागी राहिले असते. वाचन संस्कृती वाढली पाहिजे. ग्रंथ विक्री वाढली पाहिजे. यावेळी कर्मवीरांनी सुरू केलेली प्रथा जपत संस्थेने खटाव तालुक्यातील मांडवा गावातील शहीद जवान ज्ञानेश्वर खाडे यांचे माता, पिता व मिरज तालुक्यातील दुधगाव येथील शहीद जवान नितीन काळे यांच्या पत्नी व कुटुंबीयांचा दहा हजार रुपये रोख व सन्मानचिन्ह देऊन भावपूर्ण सत्कार करण्यात आला. या हृदयस्पर्शी गौरवाप्रसंगी वातावरण अतिशय भावनिक झाले होते. वीर माता, वीर पत्नीचा भावपूर्ण सत्कार सयाजी महाराजांचे शिक्षणासाठी योगदान