शिरूरच्या टेंभेकर वस्तीत बिबट्याचा हल्ला:घराबाहेर खेळत असलेला 4 वर्षाचा मुलगा ठार

पुणे जिल्ह्यातील शिरूर तालुक्यातील मांडवगण फराटा परिसरात टेंभेकर वस्ती येथे घराच्या अंगणात खेळत असलेल्या चार वर्षांच्या मुलावर बिबट्याने अचानक हल्ला करत त्याला उसाच्या शेतात नेऊन ठार मारले आहे.शिवतेज समाधान टेंभेकर (वय ४) असे बिबट्याच्या हल्ल्यात मयत झालेल्या मुलाचे नाव आहे. वन विभागाने दिलेल्या माहितीनुसार, शिवतेज हा शुक्रवारी त्याचा घरासमोरील अंगणात खेळत होता. यावेळी दबा धरून बसलेल्या बिबट्याने त्याच्यावर हल्ला केला आणि त्याला शेजारील शेतात उचलून नेले. त्याच्या आवाजाने घरातील लोक आणि आजुबाजुचे शेजारी बीबट्याच्या मागे धावले. पण तो पर्यंत या हल्ल्यात मुलाचा दुर्दैवी मृत्यू झाला होता. शिरुर तालुक्यातील टेंभेकर वस्तीमधे शिवतेज समाधान टेंभेकर हा त्याच्या आई व वडील यांचेसह गावी दिवाळीसाठी पुण्याहून आला होता. यात घराच्या अंगणात खेळत असताना, सध्याकाळी 6.30 च्या सुमारास घराच्या बाजूला असलेल्या उसाचे शेतात दडून बसलेल्या बिबट्याने सावज समजून त्याच्यावर अचानक प्राण घातक हल्ला केला. त्यावेळेस त्याचे आजोबा पांडुरंग टेंभेकर यांनी आरडा- ओरडा करून बिबट्याला प्रतिकार करण्याचा प्रयत्न केला असता, बिबट्याने त्यांना न जुमानता शिवतेज यास सुमारे 400 मीटर अंतरावरील उसाच्या शेतात फरपटत नेले. याबाबाबतची माहिती वन विभागाला दिली असता, वनविभागाचे अधिकारी- कर्मचारी यांनी घटना स्थळी पोहचून मृत अवस्थेत असलेल्या शिवतेज याचे शवाचे पाहणी करून परिसरातील वन्यप्राणी बिबटच्या अस्तित्वाची खात्री केली. त्यानंतर मयत शिवतेजचे शव शवविच्छेदनाकरिता उपजिल्हा रुग्णालय, शिरूर येथे पाठविण्यात आले. घटनास्थळी जुन्नर वनविभागाचे उपवनसंरक्षक अमोल सातपुते यांनी तात्काळ भेट दिली व पाहणी करून सरपंच व उपसरपंच व वनकर्मचारी यांच्याशी सदर घटने विषयी चर्चा करून मार्गदर्शन केले. सदर ठिकाणी हल्ला केलेल्या बिबट्याला पकडण्या करिता ड्रोन कॅमेऱ्याचा वापर करून त्याचा शोध घेऊन तात्काळ पिंजरे व ट्रॅप कॅमेरे लावण्याच्या सूचना दिल्या. बिबट्याला जेरबंद करण्यासाठी 22 पिंजरे, 10 कॅमेरा ट्रॅप लावण्यात आले असून 5 अनायडर आणि थर्मल ड्रोन द्वारे बिबटच्या हालचाली वर लक्ष ठेवण्याची कार्यवाही करण्यात आले आहे.