शिर्डी दर्ग्याचा वाद : आपली विचारसरणी बदलली का ? राष्ट्रवादीच्या आमदाराला मुस्लीम संस्थेचा सवाल

शिर्डीतील साई मंदिरातील मजारचा वाद वाढला आहे. राष्ट्रवादीचे आमदार संग्राम जगताप यांनी शिर्डीत येऊन या संदर्भात दोन समाजात तेढ निर्माण होईल असे वक्तव्य केल्याने खळबळ उडाली आहे. या संदर्भात मुस्लिम वेल्फेअर असोसिएशनचे सलीम सारंग यांनी राष्ट्रवादी अजित गटाचे आमदार संग्राम जगताप यांना खरमरीत पत्र लिहीले असून स्थानिक वादात बाहेरच्या आमदारांनी येऊन नाक खुपसू नये असा सल्ला दिला आहे.

राष्ट्रवादी काँग्रेस पक्षाचे आमदार संग्राम जगताप यांनी या शिर्डीच्या साई मंदिरासमोरील मजार आणि दर्ग्याबाबत आक्षेपार्ह व्यक्तव्य केल्यानंतर आता मुस्लिम वेल्फेअर असोसिएशनने त्यांना पत्र लिहून जाणीव पूर्वक तेढ निर्माण करण्याचा प्रयत्न करू नये असे म्हटले आहे. शिर्डी संस्थान आणि स्थानिक नागरिक हाजी अब्दुल बाबा दर्ग्याबाबत योग्य तो निर्णय घेतील, आपण जाणीवपूर्वक वाद निर्माण होईल अशा कृती करू नका असे आवाहन मुस्लिम विल्फेअर असोसिएशनचे प्रमुख सलीम सारंग यांनी केले आहे. या संदर्भात जर काही कायदा आणि सुव्यवस्थेचा प्रश्न निर्माण झाला तर याची पूर्णपणे जबाबदारी संग्राम जगताप यांची असेल असा इशारा देखील सलीम सारंग यांनी दिला आहे.

विचारधारेपासून दूर जात आहात

मुस्लिम वेल्फेअर असोसिएशन आपल्या निदर्शनास आम्ही काही महत्त्वाचे मुद्दे आणून देऊ इच्छित आहे. शिर्डी येथील साई मंदिरासमोरील मज़ार प्रकरणात आपण केलेल्या आक्षेपार्ह विधानांमुळे समाजात फूट पाडण्याचा आणि धार्मिक तेढ निर्माण आहे. आपण राष्ट्रवादी काँग्रेस पक्षाचे आमदार आहात. जो शिव शाहू फुले आंबेडकर यांच्या समतावादी विचारांवर आधारलेला आहे. मात्र आपल्या कृती आणि विधानांमुळे असे दिसते की आपण या विचारधारेपासून दूर जात आहात. आणि विचारधारेला हरताळ फासण्याच काम करीत आहात.

हे सुद्धा वाचा

शिर्डीतील मजाराचा मुद्दा स्थानिक नागरिकांनी आणि प्रशासनाने एकत्रितरीत्या समजूतीने आणि शांततेत सोडवावा हीच आमची अपेक्षा आहे. मात्र आपण बाहेरच्या मतदारसंघातून शिर्डीमध्ये जाऊन हिंदू मुस्लिम वाद उभा करण्याचा प्रयत्न करीत असल्याचे स्पष्ट होत आहे. हे वर्तन आपल्या पदाला शोभणारे नाही. ना पक्षाच्या विचारधारेशी सुसंगत आहे असेही सलीम सारंग यांनी पत्रात म्हटले आहे.

आपली विचारसरणी बदलली आहे का?

आपण आपल्या मतदारसंघात अशाच प्रकारे पक्षाच्या विचारधारेच्या विरोधातली भूमिका घेता आणि धार्मिक तेढ निर्माण करीत असता असे सातत्याने निदर्शनास येत आहे. लोकांनी तुम्हाला त्यांच्या समस्यांवर काम करण्यासाठी निवडून दिले आहे. धार्मिक वाद वाढवण्यासाठी नक्कीच नाही. आपण राष्ट्रवादी काँग्रेस पक्षाचे प्रतिनिधीत्व करता, ज्याचा पाया सर्वधर्मसमभाव म्हणजेच सर्वांना सोबत घेऊन जाण्याचा आहे. त्यामुळे आपल्या सध्याच्या वागण्यावरून आपण आपली विचारसरणी बदलली आहे का? हा प्रश्न या निमित्ताने उपस्थित होतो असा टोला या पत्रात सलीम सारंग यांनी लगावला आहे.