साळशीत विनापरवाना सागवान लाकूड जप्त

कणकवली ः देवगड तालुक्यातील साळशी येथे वन विभागाने विनापरवाना सागवानी इमारती लाकडाची वाहतूक करणार्‍या बोलेरो पिकअपला पकडत गोल इमारती नग लाकूड जप्त केले. याप्रकरणी तिघांवर गुन्हा दाखल करण्यात आला आहे.

सावंतवाडी उपवनसंरक्षक नवकिशोर रेड्डी, सहायक वनसंरक्षक डॉ. सुनील लाड, कणकवलीचे वनक्षेत्रपाल राजेंद्र घुणकीकर यांच्या मार्गदर्शनाखाली देवगड वनपाल श्रीकृष्ण परीट, मिठबांव वनरक्षक आप्पासाहेब राठोड, ठाकूरवाडी वनरक्षक रामदास घुगे यांनी ही कारवाई केली. सागवानी इमारती लाकडांच्या नगांची बोलेरो पिकअपमधून वाहतूक होताना ही कारवाई केली.

लाकडासह गाडी जप्त करून माल फोंडा विक्री आगार येथे ठेवला. याप्रकरणी दिगंबर गावकर (78, रा. साळशी), संजय वळंजू (57, रा. रेंबवली), संकेत तर्फे (27, रा. कुवळे) यांच्यावर गुन्हा दाखल करण्यात आला आहे. अधिक तपास वनक्षेत्रपाल राजेंद्र घुणकीकर यांच्या मार्गदर्शनाखाली वनपाल श्रीकृष्ण परीट करत आहेत.