सैफ अली खानवरील हल्ल्यावर राजकीय भाष्य उचित नाही: भुसे

पुण्यात शैक्षणिक विभागाच्या बैठकीअगोदर भुसे यांनी प्रसारमाध्यमांशी संवाद साधला. कलाकारांसाठी मुंबई शहर सुरक्षित राहिलेले नाही, या विरोधकांच्या आरोपांवर भुसे म्हणाले, अभिनेत्यावर हल्ला झाला म्हणून मुंबई सुरक्षित नाही हा आरोप करणे चुकीचे आहे. मुंबई देशाची आर्थिक राजधानी असून, सर्वांसाठी महत्त्वाचे शहर आहे. घटनेचे गांभीर्य विरोधकांनी ओळखून राजकीय भाष्य करणे टाळावे आणि जबाबदारीने बोलण्याचे भान ठेवावे.

आगामी स्थानिक स्वराज्य संस्थांची निवडणूक ही महायुती की स्वबळावर लढायची याचा निर्णय मुख्यमंत्री आणि दोन्ही उपमुख्यमंत्री मिळून घेतील. निवडणूक कोणतीही असूदे शिवसैनिक सदैव तयार असतो. 80 टक्के समाजकारण आणि 20 टक्के राजकारण हे बाळासाहेब ठाकरेंचे ब्रिदवाक्य घेऊन शिवसैनिक निवडणुकीला सामोरे जातो. योग्य वेळी पालकमंत्रिपद जाहीर केले जाईल, असेही भुसे यांनी स्पष्ट केले.