हळदी-कुंकू पारंपरिक संस्कृतीचे जतन करणारा सोहळा- अभ्यंकर:हंतोडा येथील अभ्यंकर विद्यालयात हळदी-कुंकू समारंभ थाटात

हळदी-कुंकू पारंपरिक संस्कृतीचे जतन करणारा सोहळा आहे. या कार्यक्रमाने महिला एकत्र येऊन आपल्या विचारांची देवाण-घेवाण करत असतात. अशा कार्यक्रमातून महिला सशक्तीकरणाला दिशा मिळत असते. त्यामुळे महिलांमध्ये सामाजिक बांधिलकी व सामाजिक ऐक्याची भावना निर्माण होण्यास मदत होते, असे प्रतिपादन राहुल व्यायाम प्रसारक मंडळाच्या संचालिका प्रा. शुभांगी अभ्यंकर यांनी केले. अंजनगाव सुर्जी तालुक्यातील हंतोडा येथील श्री सुखदेवराव अभ्यंकर विद्यालयात नुकतेच स्नेहसंमेलनाचे आयोजन केले होते. त्या प्रसंगी माता पालकांसाठी हळदी कुंकू कार्यक्रमाचे आयोजन केले होते. त्या वेळी उपस्थित महिलांना मार्गदर्शन करताना अध्यक्षीय भाषणप्रसंगी त्या बोलत होत्या. राहुल व्यायाम प्रसारक मंडळाचे संस्थापक अध्यक्ष मधुकरराव अभ्यंकर व अध्यक्ष क्षितिज अभ्यंकर यांच्या मार्गदर्शनात संपूर्ण संस्थे अंतर्गत येणाऱ्या विद्यालयांमध्ये स्नेहसंमेलनाचा उपक्रम सुरू आहे. हाच उपक्रम हंतोडा येथील अभ्यंकर विद्यालयात नुकताच स्नेहसंमेलनादरम्यान प्रा. शुभांगी अभ्यंकर यांच्या अध्यक्षतेखाली पार पडला. प्रा. शुभांगी अभ्यंकर म्हणाल्या, घरातील स्त्री म्हणून वावरताना सर्वच भूमिका महिला यशस्वीपणे पार पाडतात. मात्र, त्याच वेळी त्यांचे स्वत:चा आनंद, आवडी निवडी, छंद याकडे दुर्लक्ष होत असते. त्यांनाही थोडा वेळ स्वत:साठी मिळावा, त्यांच्यातील सुप्त कलागुणांना वाव मिळावा, या उद्देशाने मकर संक्रांतीनिमित्त हळदी कुंकू समारंभाचे आयोजन केले असून, महिलांसाठी विविध स्पर्धाही आयोजित केल्याचे सांगत त्या माध्यमातून स्वत:मध्ये असलेल्या सुप्त कला गुणांना चालना द्यावी, असे आवाहन प्रा. अभ्यंकर यांनी या प्रसंगी उपस्थित महिलांना केले. मकर संक्रांतीनिमित्त हळदी कुंकवाचा कार्यक्रम म्हणजे संस्कार आणि संस्कृती मिलनाचा अनोखा कार्यक्रम म्हणून हळदी कुंकू कार्यक्रमाचे आयोजन करण्यात आले होते. या प्रसंगी शाळेतील विद्यार्थ्यांच्या माता पालक व गावातील महिलांनी उत्स्फूर्त सहभाग नोंदवला होता. या प्रसंगी उपस्थित प्रत्येक महिलेला तिळगुळ व वाण देण्यात आले. या उपक्रमात हंतोडा, मलकापूर, विहीगाव व मुऱ्हा गावातील विद्यार्थ्यांचे पालक व महिला या उपक्रमात सहभागी झाले होते. या वेळी हंतोडाच्या सरपंच पूजा गोळे, मलकापूरच्या सरपंच रिना काळे, मनीषा हंतोडकर, किरण खिरकर, चैताली चव्हाण, भाग्यश्री आठवले, अस्मिता अभ्यंकर, कांचन घंटाघोष, ज्योती खारोडे, सोनू गवई, कविता हंतोडकर, आरती आठवले, रिना आठवले, जया बहिरे, स्वाती तराळे, सरिता खिरकर, रजनी उईके आदींसह मोठ्या संख्येने माता पालक व गावातील महिला उपस्थित होत्या. कार्यक्रमासाठी सारिका वाठ, मयुरी लोखंडे, श्रद्धा गोळे, शीला गावंडे आदींनी परिश्रम घेतले. यांचीही लाभली होती उपस्थिती : कार्यक्रमप्रसंगी रेहाना परवीन, स्वाती वानखडे, शालिनी मोहोळ, दर्शना इंगळे, प्रतिभा सोनवणे, सुशीला आठवले, मंगला उईके, राजनंदिनी वानखडे, रिता कान्हरेकर, मीना खारोडे, दीपा सोळंके, प्रीती मोरे, अनिता आठवले, अर्चना माहुलकर, सुनीता माहुलकर, उज्वला वानखडे, शीतल मुरकुटे, संगीता मालटे, सुनीता तायडे, रिना गोळे, चंदा आठवले, वनिता इंगळे आदी उपस्थित होत्या. महिलांसाठी रांगोळी, चित्रकलासह विविध स्पर्धा या प्रसंगी महिलांसाठी विविध स्पर्धांचे आयोजन करण्यात आले होते. उखाणे, गवळण, रांगोळी स्पर्धा, चित्रकला स्पर्धा आदी सांस्कृतिक कार्यक्रमाचे देखील आयोजन करण्यात आले होते. या सर्व महिलांना संस्थेच्या संचालिका शुभांगी अभ्यंकर, पद्मा ढेपे, मंगला वंजारी यांच्या हस्ते हळदी कुंकू व वाण देण्यात आले.