हिंगोली जिल्हा परिषदेत घुमला डफड्याचा आवाज:जल जीवन नळ पाणी पुरवठा योजनेच्या निधीसाठी कंत्राटदारांचे डफडे बजाव आंदोलन

हिंगोली जिल्ह्यात जल जीवन मिशन अंतर्गत नळ पाणी पुरवठा योजनेच्या कामांच्या देयकासाठी निधी द्यावा या मागणीसाठी कंत्राटदारांनी मंगळवारी ता. ४ दुपारी जिल्हा परिषदेत डफडे बजाव आंदोलन केले. योजनेची कामे आहे त्या स्थितीत बंद ठेवण्याचा निर्णय कंत्राटदारांनी घेतला आहे. हिंगोली जिल्ह्यात जल जीवन मिशन अंतर्गत ६१९ नळपाणी पुरवठा योजनांची कामे केली जात असून त्यापैकी सुमारे २०० कामे पूर्ण झाली आहेत. मात्र मागील पाच ते सहा महिन्यांपासून कामांसाठी निधीच देण्यात आला नाही. तर दुसरीकडे शासनाकडून योजनां पूर्ण करण्यासाठी कंत्राटदारांवर दबाव आणला जात आहे. मात्र निधी नसतांना कामे पूर्ण कशी करावी असा सवाल कंत्राटदारांकडून उपस्थित केला जात आहे. दरम्यान, जिल्ह्यातील नळ पाणी पुरवठा योजनेच्या कामांचा थकीत असलेला सुमारे ३० कोटी रुपयांचा निधी तातडीने द्यावा या मागणीसाठी कंत्राटदारांनी आज जिल्हा परिषदेत डफडे बजाव आंदोलन केले. यावेळी संतोष घुगे, अविनाश पानपट्टे, संदीप पतंगे, सुरेश शेळके, अनंत गिरी, नामदेव कोरडे, विष्णू जगताप, ज्ञानेश्‍वर गरड, दीपक जैस्वाल, भागवत भोयर यांच्यासह कंत्राटदारांची उपस्थिती होती. यावेळी ग्रामीण पुरवठा विभागा समोर डफडे वाजवून निधीची मागणी करण्यात आली. यावेळी अभियंत्यांकडे मागण्यांचे निवेदन सादर करण्यात आले. प्रशासनाने तातडीने निधी उपलब्ध करून द्यावा अन्यथा ता. १७ फेब्रुवारीपासून काम बंद आंदोलन करण्याचा इशारा निवेदनाद्वारे देण्यात आला आहे.