11,122 उमेदवारांनी दिली एमपीएससी परीक्षा:परीक्षा केंद्रांवर पेजर, मोबाइल, ब्लूट्युथ अशा वस्तूंना होती बंदी

महाराष्ट्र लोकसेवा आयोगामार्फत रविवार महाराष्ट्र गट ब अराजपत्रित सेवा संयुक्त पूर्व परीक्षा - २०२४ घेण्यात आली. शहरात एकूण ४४ केंद्रांवर जिल्ह्यातील ११ हजार १२२ उमेदवारांनी परीक्षा दिली, तर २ हजार ११३ उमेदवार विविध कारणांनी गैरहजर राहिले. जिल्हा प्रशासनाने यासाठी एकूण १ हजार २२० अधिकारी, कर्मचाऱ्यांची नेमणूक केली होती. सकाळी ११ ते १२ या वेळेत पेपर घेण्यात आल्याची माहिती जिल्हा प्रशासनाने दिली. महाराष्ट्र राज्य लोकसेवा आयोगाकडून आयोजित करण्यात येणाऱ्या परीक्षासंदर्भात कमाल वयोमर्यादेत एक वर्ष शिथिलता देण्याचा निर्णय शासनाने घेतला. यानुसार ‘महाराष्ट्र गट-ब (अराजपत्रित) सेवा संयुक्त पूर्व परीक्षा २०२४ व ‘महाराष्ट्र गट-क सेवा संयुक्त पूर्व परीक्षा-२०२४ साठी वयाधिक विद्यार्थ्यांना अर्ज सादर करण्यास पुन्हा एकदा संधी दिली होती. या दरम्यान परीक्षांच्या वेळापत्रकातही बदल करण्यात आला होता. ‘गट-ब’ सेवा संयुक्त पूर्व परीक्षा रविवार, २ फेब्रुवारीला पार पडली. तसेच ‘गट-क’ सेवा संयुक्त पूर्व परीक्षा ४ मे रोजी होणार आहे. दरम्यान यात सहायक कक्ष अधिकारी गट ब ५४ पदे, राज्य कर निरीक्षक एकूण २०९ पदे, पोलिस उपनिरीक्षक एकूण २१६ अशी एकूण ४८० पदांसाठी ही परीक्षा घेण्यात आली. तत्पूर्वी अमरावती जिल्ह्यात १३ हजार २४८ उमेदवार पात्र ठरले होते. त्यापैकी ११ हजार १२२ हजर, तर २ हजार ११३ गैरहजर राहिले. दरम्यान उमेदवारांनी सकाळी ९.३० वाजता परीक्षा केंद्रावर हजर राहणे बंधनकारक असल्याने परीक्षार्थी पहाटेपासूनच पोहोचले होते. सकाळी १०.३० वाजता विद्यार्थ्यांना प्रवेश देण्यात आला. उमेदवारांना परीक्षा केंद्रात पेजर, मायक्रोफोन, मोबाइल, ब्लूट्युथ, हेड फोन, कॅमेरा अशा वस्तू नेण्यास बंदी घालण्यात आली होती. परीक्षा उपकेंद्रांवर गर्दीचे नियंत्रण, उमेदवारांची तपासणी कसून करण्यात आली. तसेच प्रवेश प्रमाणपत्रावरील क्यूआर कोड स्कॅन करूनच उमेदवारांची ओळख पडताळणी करण्यात आली. परीक्षा केंद्राच्या प्रवेशद्वारावर दोन सीसीटीव्ही कॅमेरे बसवण्यात आले होते. तर प्रत्येक परीक्षा केंद्रात एक कॅमेरा होता. याचे लाइव्ह चित्रीकरण पाहण्याची व्यवस्था करण्यात आली होती.