तोंडी सूचनेवरून गौण खनीज वाहतूक करणारे वाहन सोडले:तत्कालीन तहसीलदारास कारणे दाखवा नोटीस, तातडीने खुलासा करण्याचे आदेश

वसमत तालुक्यातील हट्टा येथे गौणखनीज वाहतूक करणारे वाहन वरिष्ठांच्या आदेशा शिवाय तोंडी सूचनेवरून सोडणारे वसमतचे तत्कालीन तहसीलदार तथा विद्यमान तुळजापूर (जि. धाराशिव) येथील तहसीलदार अरविंद बोळंगे यांना कारणे दाखवा नोटीस बजावण्यात आली आहे. या प्रकरणी तातडीने खुलासा करण्याचे आदेश जिल्हाधिकारी अभिनव गोयल यांनी दिले आहेत. याबाबत सुत्रांनी दिलेल्या माहितीनुसार, वसमत तालुक्यातील हट्टा येथे तलाठी नागनाथ राऊत व अश्‍विन आहेर यांच्या पथकाने ता. 9 मार्च 2021 रोजी अवैधरित्या वाळू वाहतूक करीत असल्याच्या संशयावरून एक वाहन (एमएच-२४-जे-५७०३) पकडले होते. सदर वाहन हट्टा पोलिस ठाण्यात आणून उभे करण्यात आले होते. मात्र तत्कालीन तहसीलदार अरविंद बोळंगे यांनी सदर वाहनाचे वाहतूक पास व वाहतूक परवाना पासेसची पडताळणी केली असा परवाना वैध असल्याचे सांगत ता. 10 मार्च रोजी सदर वाहन सोडून देण्यात आले. या प्रकरणात तक्रार झाल्यानंतर जिल्हाधिकारी गोयल यांनी वसमतचे उपविभागीय अधिकारी विकास माने यांना तातडीने अहवाल सादर करण्याच्या सूूचना दिल्या होत्या. त्यानुसार या चौकशीमध्ये तहसीलदार बोळंगे यांनी दिलेल्या पत्रात वाहतूक पासची पडताळणी करणारे अप्लीकेशन बंद झाले, अप्लीकेशनमध्ये बदल झाल्याने त्यावेळेची कागदपत्रे व एसएमएस उपलब्ध नसल्याचे नमुद केले. यावरून तहसीलदार बोळंगे यांच्याकडून खुलासा मागविणे योग्य राहिल असा अहवाल उपविभागीय अधिकारी विकास माने यांनी जिल्हाधिकारी कार्यालयाकडे दिला आहे. त्यावरून जिल्हाधिकारी गोयल यांनी बोळंगे यांना तातडीने नोटीस पाठवली असून वरिष्ठांच्या आदेशा शिवाय वाहन सोडून देणे, वाहनात अवैधरित्या गौणखनीज वाहतूक केली जात होती काय याची पडताळणी न करणे यामुळे शासनाच्या महसुलाचे नुकसान झाले आहे. त्यामुळे आपणा विरुध्द शिस्तभंगाच्या कारवाईचा प्रस्ताव आयुक्त कार्यालयाकडे का सादर करू नये याचा तातडीने खुलासा करण्याचे आदेश जिल्हाधिकारी गोयल यांनी दिले आहे.