Nashik Child mortality | जिल्ह्यात बालमृत्यू कमी, पण आव्हाने कायम

नाशिक : गत दोन वर्षांपासून जिल्ह्यातील बालमृत्यूंचे प्रमाण घटल्याचे आकडेवारीतून उघड झाले आहे. १ एप्रिल २०२४ पासून आजतागायत सुमारे ४२३ बालमृत्यूंची नोंद झाली आहे. मात्र, मागील पावणेचार वर्षांत तब्बल १,९८५ बालमृत्यूंची गंभीर नोंद झाली आहे. आरोग्य विभागाच्या माहितीनुसार, ही सर्व बालके ० ते ५ वयोगटातील असून, त्यातील बहुसंख्य कमी वजनाची होती. जिल्हा परिषदेच्या आरोग्य विभागाच्या अंतर्गत बालमृत्यू समितीच्या बैठकीतून ही बाब अधोरेखित झाली आहे.

बालमृत्यू कमी करण्याच्या उद्देशाने सार्वजनिक आरोग्य विभाग आणि महिला व बालविकास विभागाच्या वतीने सातत्याने प्रयत्न सुरू आहेत. तसेच जिल्हा परिषदेच्या माध्यमातून गर्भवती महिलांसह स्तनदा माता आणि बालकांसाठी विविध योजना राबवल्या जात आहेत. या योजनांमुळे मागील दोन वर्षांत सुमारे १५० बालमृत्यूंमध्ये घट झाली असल्याचे स्पष्ट झाले आहे. प्रशासनाच्या प्रयत्नांमुळे बालमृत्यूंचे प्रमाण कमी झाले असले, तरी ते पूर्णतः नियंत्रणात येण्यासाठी अजूनही अनेक आव्हानांना तोंड द्यावे लागत आहे. त्यामुळे भविष्यात या समस्येवर मात करण्यासाठी अधिक प्रभावी उपाययोजना अपेक्षित आहेत.

जिल्ह्यातील बालमृत्यू कमी करण्यासाठी जिल्हा परिषद आणि आयआयटी मुंबईच्या सहकार्याने गरोदर व स्तनदा मातांना प्रशिक्षण दिले जाते. बालकांच्या देखभालीसाठी समुपदेशन, आशासेविका व अंगणवाडीसेविकांचे प्रशिक्षण, पोषण पुनर्विकास केंद्राची उभारणी, तसेच माता-बालकांची नियमित आरोग्य तपासणी केली जाते.