Nashik | चांदवडला आमदार डॉ. राहुल आहेर यांची हॅट्रीक

चांदवड देवळा विधानसभा मतदार संघाच्या चुरशीच्या झालेल्या निवडणुकीत महायुतीचे उमेदवार डॉ. राहुल आहेर यांनी एक लाख चार हजार ८२६ मते घेत हॅट‌्ट्रीक केली. त्यांनी प्रहार जनशक्ती पक्षाचे उमेदवार गणेश निंबाळकर यांचा ४८ हजार ९६१ मतांनी पराभव केला. निंबाळकर यांना ५५ हजार ८६५ मते मिळाली. माजी आमदार शिरीष कोतवाल, अपक्ष उमेदवार केदा आहेर यांनाही पराभवाचा सामना करावा लागला.

येथील प्रशासकीय इमारतीच्या सभागृहात शनिवारी (दि. २३) सकाळी ८ वाजता मतमोजणीस निवडणूक निर्णय अधिकारी कैलास कडलग, सहा. निवडणूक निर्णय अधिकारी मंदार कुलकर्णी, मिलिंद कुलकर्णी यांच्या मार्गदर्शनाखाली सुरवात करण्यात आली. यावेळी मतमोजणीस बूथनिहाय देवळा तालुक्यातून सुरुवात करण्यात आली. अपेक्षेप्रमाणे सुरवातीस डॉ. राहुल आहेरांनी पहिल्या फेरीत ३४७० मतांची आघाडी घेतली. देवळा तालुक्याच्या आठ फेऱ्यांमध्ये निर्णायक अशी २७ हजार मतांची भरभक्कम आघाडी घेतली. यानंतर चांदवड तालुक्यातील मतांची मोजणी करण्यात आली. यात देखील डॉ.आहेरांना मतांची आघाडी मिळाली. देवळा तालुक्यात अपक्ष उमेदवार केदा आहेरांना दोन नंबरची मते होती. त्यानतर वडनेरभैरव, वडाळीभोई, तळेगावरोही गटातील गावांमध्ये गणेश निंबाळकर यांनी मतांची आघाडी घेत केदा आहेर यांना मागे टाकले. माजी आमदार शिरीष कोतवाल हे शेवटपर्यंत ४ नंबरला होते. डॉ. राहुल आहेरांनी सुरुवातीपासून घेतलेली मतांची आघाडी शेवटपर्यंत एकाही उमेदवाराला तोडता आली नाही. त्यामुळे आहेरांचा विजय सरळसरळ सोपा झाला. सायंकाळी साडेपाच वाजेच्या सुमारास निवडणूक निर्णय अधिकारी कैलास कडलग यांनी डॉ. राहुल आहेरांनी १ लाख ४ हजार ८२६ मते मिळविल्याने त्यांचा विजय झाल्याचे घोषित केले. यावेळी चांदवड देवळा विधानसभा मतदार संघात विजयी झाल्याबद्दल डॉ. राहुल आहेरांना मा. कडलग यांच्या हस्ते प्रमाणपत्र देण्यात आले.