Parbhani Assembly constituency: परभणीच्या चार विधानसभा मतदार संघात 15 लाख 44 हजार मतदार

पत्रकार परिषदेत परभणी जिल्हाधिकारी रघुनाथ गावडे यांची माहिती

परभणी (Parbhani Assembly constituency) : विधानसभा निवडणुकीचा बिगुल वाजला आहे. परभणी जिल्ह्यात जिंतूर, परभणी, गंगाखेड, पाथरी असे चार विधानसभा क्षेत्र आहेत. १५ ऑक्टोबरच्या मतदार यादीनुसार या क्षेत्रात १५ लाख ४४ हजार ४५१ इतके मतदार आहेत. त्यामध्ये ७ लाख ९५ हजार ७१४ पुरुष, ७ लाख ४७ हजार ५३० महिला, तृतीय पंथी २९ तर सैन्य दलातील १ हजार १७८ एवढे मतदार आहेत, अशी माहिती बुधवार १६ ऑक्टोबर रोजी जिल्हाधिकारी कार्यालयात आयोजीत पत्रकार परिषदेत जिल्हाधिकारी रघुनाथ गावडे यांनी दिली. यावेळी अप्पर जिल्हाधिकारी डॉ. प्रताप काळे, उपजिल्हाधिकारी जनार्धन विधाते यांची उपस्थिती होती.

विधानसभेच्या सार्वत्रिक निवडणुकीचा कार्यक्रम जाहीर होताच विविध राजकीय पक्षांच्या नेत्यांसह प्रशासन देखील कामाला लागले आहे. राज्यात एकाच टप्प्यात मतदान होणार आहे. परभणी जिल्ह्यात जिंतूर, परभणी, गंगाखेड, पाथरी असे चार विधानसभा मतदार संघ आहेत. या मतदार संघात उपविभागीय अधिकारी यांना निवडणूक निर्णय अधिकारी म्हणून घोषित करण्यात आले आहे. प्रत्येक विधानसभा मतदार संघासाठी तीन सहाय्यक निवडणूक निर्णय अधिकारी असतील. प्रत्येक विधानसभा निहाय एक मतदान केंद्रावर केवळ महिला अधिकारी असतील. एका ठिकाणी केवळ दिव्यांग मतदान अधिकारी असतील.

तर एका ठिकाणी तरुण अधिकारी मतदान अधिकारी म्हणून काम पाहतील. काही मतदान केंद्र आदर्श मतदान केंद्र म्हणून तयार करण्यात येतील. तसेच आयोगाच्या सुचनेनुसार ५० टक्के मतदान केंद्रावर वेब कास्टींग सुध्दा करण्यात येणार आहे. निवडणुकीसाठी परभणी जिल्ह्यात १७१ क्षेत्रीय अधिकारी, विविध पथकामध्ये ५५० अधिकारी, कर्मचारी आणि मतदान केंद्रावरील अधिकारी मिळून १२ हजार ५६८ मनुष्यबळ उपलब्ध आहे. निवडणुकीत कर्तव्यावर असलेल्या कर्मचार्‍यांसाठी पोस्टल मतदानाची सुविधा पुरविण्यात येणार आहे. जिल्ह्यात सद्यस्थितीत ३ हजार ६०२ बॅलेट युनिट, १ हजार ९७६ कंट्रोल युनिट आणि २ हजार १२७ व्हिव्हिपॅट मशीन उपलब्ध आहेत. ८५ पेक्षा अधिक वय असलेले मतदार आणि ४० टक्के पेक्षा अधिक दिव्यांगत्व असलेल्या मतदारांना गृह मतदानाची सुविधा उपलब्ध करुन देण्यात आली आहे. निवडणुकीची अधिसूचना प्रसिध्द झाल्यानंतर पुढच्या पाच दिवसापर्यंत या मतदारांनी स्वाक्षरी केलेले प्रपत्र १२ ड निवडणूक निर्णय अधिकारी यांच्याकडे बिएलओ मार्फत प्राप्त करुन सादर करावेत.