Priyanka Gandhi road show: काँग्रेस नेत्या प्रियांका गांधींच्या रोड शो; नागपुरात भाजप कार्यकर्त्यांचा राडा…

नागपूर (Priyanka Gandhi) :  नागपुरात काँग्रेस नेत्या प्रियंका गांधी यांचा रोड शो सुरु आहे. पश्चिम नागपूर विधानसभा मतदारसंघात प्रियंका गांधी यांचा हा रोडशो आहे. नागपूरात या रोड शोमध्ये काँग्रेस आणि भाजपचे कार्यकर्ते आमने-सामने आले असून, पोलिसांकडून जमावाला सावरण्याचे प्रयत्न सुरु आहे.

काँग्रेसच्या सरचिटणीस प्रियंका गांधी यांचा आज पश्चिम नागपुरातील अवस्थीनगर आणि मध्य नागपुरातील गांधी गेट, महाल येथे रोड-शो सुरु आहे. काँग्रेसचे पश्चिम नागपूरचे उमेदवार विकास ठाकरे आणि मध्य नागपूरचे उमेदवार बंटी शेळके यांच्या प्रचारार्थ प्रियंका गांधी यांचा रोड-शो आयोजित करण्यात आला आहे. या रोड शोदरम्यान बडकत चौकात काँग्रेस आणि भाजपचे कार्यकर्ते आमने सामने आले. प्रियांका गांधी यांचा रोड शो बडकत चौकात थांबवण्यात आला. काँग्रेस आणि भाजप कार्यकर्ते आमने सामने आल्याने मोठी घोषणाबाजी करण्यात आली. दोन्ही पक्षांच्या कार्यकर्त्यांकडून पक्षाच्या समर्थनार्थ घोषणाबाजी आणि राडा करण्यात आला.

काँग्रेस नेत्या प्रियंका गांधी नागपुरात येणार असल्याचे कळल्यानंतर शहर काँग्रेस व महाविकास आघाडीच्या कार्यकर्त्यांमध्ये उत्साह होता. तसेच लोकांनी देखील प्रियंका यांना बघण्यासाठी गर्दी केली होती. यापूर्वी गांधी कुटुंबातील इंदिरा गांधी, राजीव गांधी, सोनिया गांधी तसेच राहुल गांधी नागपुरात प्रचारासाठी आले होते. मात्र, प्रियंका गांधी यांचा हा पहिलाच दौरा होता.