Raj Thackeray : आपल्याला लोकांनी केलेलं मतदान गायब झालं, राज ठाकरे यांचा मोठा दावा

“या मतदानावर जाऊ नका, लोकांनी आपल्याला मतदान केलय पण ते आपल्यापर्यंत आलेलं नाही. तुम्ही असं कुठेही मनात धरु नका, लोकांनी मतदान केलं पण त्यांनी केलेलं मतदान कुठेतरी गायब झालं” असं मनसे अध्यक्ष राज ठाकरे म्हणाले. विधानसभा निवडणूक निकालानंतर राज ठाकरे पहिल्यांदाच बोलले. “अशा प्रकारच्या निवडणुका लढवायच्या असतील तर निवडणुका न लढवलेल्याच बऱ्या. अर्थात ही पण गोष्ट निघून जाईल. कोणी कोणत्या गोष्टीचा अमरपट्टा घेऊन आलेला नसतो. अशा गोष्टी होत असतात” असं राज ठाकरे म्हणाले. “या देशाला स्वातंत्र्य मिळाल्यावर पहिली निवडणूक 1952 मध्ये झाली. तेव्हा संघाची राजकीय विंग जन्माला आली. तिचं नाव जनसंघ. हिंदू, हिंदुत्व या गोष्टी ते मांडत आले. त्याचा विषयच येत नाही. 75 मध्ये इंदिरा गांधींनी आणीबाणी आणली. 77 मध्ये निवडणूक झाली. त्यावेळी देशभरात इंदिरा गांधींचा दारूण पराभव झाला” असं राज ठाकरे म्हणाले.

“इंदिरा गांधी पराभूत झाल्या होत्या. मग जनता पार्टी नावाची पार्टी उभी राहिली. त्यात अनेक पक्ष होते. त्यात जनसंघ होते. 1980 मध्ये परत निवडणुका झाल्या. त्यात इंदिरा गांधी विजयी झाल्या. त्यावेळी जनसंघाची भारतीय जनता पार्टी झाली. हा भाजपचा झेंडा दिसतो. तो बदलला. जो जनता पार्टीचा आडवा झेंडा होता, भगवा आणि हिरवा हा त्यांनी उभा केला. 80 साली भाजप निर्माण झाली. वाजपेयी अध्यक्ष झाले. त्यांनी पक्षाची भूमिका बदलली. त्यांनी गांधीवादी समाजवाद ही भूमिका घेतली” असं राज ठाकरे म्हणाले. राज ठाकरे यांच्यावर सतत भूमिका बदलण्याची टीका होते. त्यावर राज ठाकरे यांनी भारतीय राजकारणातील घटनांवर उदहारणासह स्पष्टीकरण दिलं.

शिवसेनेने एकही जागा लढवली नव्हती

“1984 साली इंदिरा गांधी गेल्या. 78 मध्ये एक निवडणूक झाली. शरद पवारांचं पुलोद आलं. शरद पवार मुख्यमंत्री झाले. ज्यावेळी पुलोद स्थापन केला तेव्हा जनसंघ पुलोदमध्ये होता. शरद पवारांसोबत” असं राज ठाकरे म्हणाले. “75 पासून काँग्रेसच्या आणीबाणीला पाठिंबा दिला होता. 80 च्या निवडणुकीत शिवसेनेने एकही जागा लढवली नव्हती. पण शिवसेना आणि काँग्रेसची युती होती. नंतर पवारांचं सरकार बरखास्त केलं. परत 86 मध्ये पवार काँग्रेसमध्ये आले. जनता पक्ष बाहेरच राहिला. मग मराठीच्या मुद्दयावर शिवसेनेच्या हातात पालिका आली” ही आठवण राज ठाकरे यांनी सांगितली.

‘ज्या काँग्रेसला शिव्या घातल्या, त्यांच्यासोबत दीड महिन्यात युती’

“86 ची निवडणूक झाली. वाजपेयी भाजपचे अध्यक्षच होते. त्यावेळी पार्ल्यात निवडणूक झाली. हिंदुत्वाच्या मुद्द्यावर निवडणूक जिंकली गेली. त्यानंतर वाजपेयींना बाजूला केलं. हिंदू हिंदू म्हणून मतदान करू लागला हे भाजपने पाहिलं. संभाजीनगरची निवडणूक झाली. त्यानंतर भाजप शिवसेनेजवळ आली. चर्चा सुरू झाली. 84 मध्ये भाजप शिवसेना युती झाली. सेनेचे दोन उमदेवार कमळावर उभे होते, लोकसभेसाठी. मनोहर जोशी आणि वामनराव महाडीक. 90 ला परत युती झाली. 88 मध्ये पवार मुख्यमंत्री झाले. 95 मध्ये भाजप सेना युतीचं सरकार आलं. आता जर तुम्ही मंत्रिमंडळातील लोकं बघितली तर बहुतेक शिवसेना आणि काँग्रेसचे आहेत. त्यांचं सरकार आहे. त्यांना विचारणार नाही. पण तुमच्या कानात घालणार भूमिका बदलली. भूमिका बदलली. आताच्या पत्रकारांचा किती अभ्यास असतो धन्यच ते” असं राज ठाकरे म्हणाले.