Thane Fire News | बदलापूर एमआयडीसीतील केमिकल ड्रमच्या गोडावूनला आग

बदलापूर : बदलापूर पूर्व येथील मणकिवली गावाजवळ असलेल्या एका केमिकल ड्रमच्या गोडाऊनला शनिवारी (दि.16) सकाळी अकरा वाजण्याच्या सुमारास आग लागल्याची घटना घडली. सुदैवाने या घटनेत कुठलीही जिवीतहानी झाली नसून काही वेळातच आगीवर नियंत्रण मिळवण्यात यश आले आहे.

गोडाऊन मध्ये असलेले केमिकल पूर्णपणे जळून खाक झाले. आगीमुळे शहरात धुराचे लोट पसरले होते. कुळगांव बदलापूर नगर परिषदेच्या अग्निशामन दलाने ही आग आटोक्यात आणली. त्यासाठी दोन ते तीन तास प्रयत्न करावे लागले. आग बघण्यासाठी आजूबाजूच्या परिसरातून बघायची मोठी गर्दी झाली होती. कोणतीही जीवित हानी आणि दुर्घटना घडू नये म्हणून पोलिसांनी हा परिसर सील करून उपस्थित बघ्यांना या भागातून बाहेर काढले. दोन तासांच्या प्रयत्नानंतर ही आग आटोक्यात आली. शॉर्टसर्किटमुळे ही आग लागली असल्याचा प्राथमिक अंदाज बदलापूर नगर परिषदेच्या अग्निशामन विभागाने व्यक्त केला आहे. एमआयडीसीच्या परिसरात असलेले गोडाऊन आणि इतर ज्वलनशील पदार्थांच्या ठेवण्याच्या जागां बाबत नगरपालिकेच्या अग्निशमन विभागाने परवानगी देताना संबंधित गोडाऊन मालक नियम पाळत आहेत की नाही याची तपासणी करण्याची मागणी एमआयडीसी परिसरातील रहिवासी करत आहेत.