Women Voters | रायगडातील नारीशक्तीच्या हाती उमेदवारांचे भवितव्य

रायगड जिल्ह्यात पनवेल, कर्जत, उरण, पेण,अलिबाग,श्रीवर्धन आणि महाड असे सात मतदार संघ असून त्यांतील कर्जत, अलिबाग, श्रीवर्धन आणि महाड या चार मतदार संघात महिला मतदारांची संख्या पूरष मतदारांपेक्षा अधिक आहे. रायगडमधील या सात विधानसभा मतदार संघात एकूण मतदार संख्या 24 लाख 88 हजार 788 असून या मध्ये पूरुष मतदार 12 लाख 59 हजार 567 तर महिला मतदार 12 लाख 29 हजार 130 आहेत. तर तृतीयपंथी मतदार 91 आहेत.

गेल्या विस पंचवीस वर्षांपूर्वी राजकारण हा विषय आपला नाही अशी काहीशी भावना महिलांमध्ये दिसून येत असे, त्यावेळी या विषयावर त्या मोकळेपणाने बोलायला देखील तयार नसायच्या. पंरतू आता असे एकही क्षेत्र नाही की जेथे महिलांचा सहभाग नाही. स्थानिक स्वराज्य संस्था म्हणजे ग्रामपंचायत, पंचायत समिती, जिल्हा परिषद, नगरपालीका, नगरपरिषदा, महानगरपालिका, पासून अगदी विधानसभा आणि लोकसभेच्या निवडणूकांमध्ये महिलांना आरक्षण मिळाल्याने महिलांमधे जागरुकता मोठ्या प्रमाणात वाढली आहे. लोकशाहीच्या सक्षमतेकरीता आमचीही जबाबदारी मोठी आहे हा विचार आता महिलांमध्ये रुजला असून, त्यांतूनच आपण आपला मतदानाचा हक्क बजावणे आवश्यक आणि त्याकरिता आपली मतदार नोंदणी असणे महत्वाचे असल्याचे लक्षात घेऊन महिलांना मतदार नोंदणी मोहिमांना उत्स्फूर्त प्रतिसाद दिल्याचे दिसून आले. त्यातूनच रायगड जिल्ह्यातील सात विधानसभा मतदार संघांपैकी चार विधानसभा मतदार संघात महिला मतदारांची संख्या पूरुष मतदारांपेक्षा अधिक असल्याचे चित्र स्पष्ट झाले आहे.

समाजकारण, अर्थकारण, प्रशासकीय सेवा, पोलीस सेवा, संरक्षण दले या विविध क्षेत्रांबरोबरच राजकारणात देखील महिला मागे राहीलेल्या नाहीत. या सर्व क्षेत्रात महिला उच्च पदावर विराजमान झाल्या आहेत आणि त्याचा अभिमान आज समाजातील सर्वथरातील महिलांमध्ये दिसून येत आहे. त्यामुळेच आता राजकारणातही महिलांना रुची वाढल्याचे दिसून येत आहे. लोकशाहीमध्ये महिलांना संधी प्राप्त झाल्याने, या संधीचे सोन करण्याची मानसिकता महिलांमध्ये दिसून येते आणि त्यादृष्टीने त्यांचे प्रयत्न देखील दिसून येत आहेत. लोकशाही मध्ये मतदार हाच राज असतो त्यामुळे सर्व प्रथम आपली मतदार म्हणून नोंदणी अनिवार्य असल्याची भावना अनेक महिला मतदारांशी बोलताना जाणऊन आली.