امت شاہ کا پاکستان کو سخت انتباہ، مینڈھر میں انتخابی ریلی سے خطاب

عظمیٰ ویب ڈیسک

مینڈھر// وزیر داخلہ امت شاہ نے مینڈھر علاقے میں ایک انتخابی جلسے سے خطاب کرتے ہوئے کہا کہ پاکستان وزیراعظم نریندر مودی سے خوفزدہ ہے، جس کی وجہ سے سرحدوں پر طویل عرصے سے جنگ بندی کی کوئی خلاف ورزی نہیں ہوئی۔
انہوں نے انتباہ دیا کہ اگر پاکستان ایک گولی بھی چلائے گا تو بھارت اس کا جواب توپ کے گولے سے دے گا۔
شاہ نے سابق وزیراعلیٰ ڈاکٹر فاروق عبداللہ پر تنقید کرتے ہوئے کہا کہ اُن کی حکومت کے دوران علاقے میں بار بار گولہ باری ہوتی تھی، لیکن اب لوگ امن میں ہیں۔ انہوں نے دعویٰ کیا کہ پاکستان مودی کی قیادت سے خوفزدہ ہے۔
انہوں نے مزید کہا کہ پہاڑی، گوجر اور بکر وال برادریوں کے حقوق کے تحفظ کے لیے ریزرویشن میں اضافہ کیا جائے گا۔
شاہ نے سابق حکمران جماعتوں پر الزام عائد کیا کہ انہوں نے کشمیری نوجوانوں کو اسلحہ فراہم کیا اور ان کا مستقبل تباہ کیا۔
شاہ نے تین سیاسی خاندانوں—عبداللہ، مفتی، اور گاندھی—پر تنقید کرتے ہوئے کہا کہ ان کی وجہ سے ریاست میں جمہوریت کو نقصان پہنچا۔ انہوں نے پہاڑی برادری کے امیدوار مرتضیٰ خان کی حمایت کرتے ہوئے کہا کہ اگر عوام انہیں ووٹ دیں تو وہ رات کو مینڈھر کو ترقی کی نئی سمت کی طرف موڑ دیں گے۔
وزیر داخلہ نے اس بات پر زور دیا کہ بی جے پی کا وژن جموں کو عالمی معیار کے سیاحتی مقام میں تبدیل کرنا ہے۔