آب گاہوں میں داخلہ ممنوع

عظمیٰ نیوز سروس

سرینگر// محکمہ جنگلی حیات کے تحفظ نے بدھ کو عام لوگوں کو ایڈوائزری جاری کرتے ہوئے ان پر زور دیا کہ وہ آب گاہوں(کشمیر ویٹ لینڈز) میں داخل ہونے سے پہلے حکام سے مناسب اجازت حاصل کریں۔یہ ایڈوائزری دنیا کے مختلف حصوں سے ہجرت کرنے والے پرندوں کے کشمیر ویٹ لینڈز میں پہنچنے کے بعد سامنے آئی ہے۔حکام نے کہا کہ کوئی بھی شخص بغیر اجازت وائلڈ لائف پروٹیکشن ایکٹ، 1972 کی خلاف ورزی کا مرتکب ہو گا، اور “خلاف ورزی کرنے والے کے خلاف ایکٹ کی دفعات کے تحت سخت کارروائی کی جائے گی۔”محکمہ جنگلی حیات نے مطلع کیا ہے کہ دنیا کے مختلف حصوں سے نقل مکانی کرنے والے پرندے کشمیر کی آب گاہ علاقوں میں پہنچنا شروع ہو گئے ہیں،یہ پرندے سردیوں کے مہینوں میں آبی زمینوں کے درمیان آباد ہوں گے اور اسکے بعد پھر منتقل ہوں گے۔انہوں نے کہا”ان کی حفاظت اور تحفظ کو یقینی بنانے کے لیے، محکمہ جنگلی حیات کو ان نقل مکانی کرنے والے پرندوں کی حفاظت کی ذمہ داری سونپی گئی ہے۔ بدقسمتی سے، کچھ لوگ جن کے ارادے خراب ہوتے ہیں وہ پرندوں کو نقصان پہنچانے یا ان کے رہائش گاہوں میں خلل ڈالنے کی کوشش کرتے ہیں، ایسی سرگرمیوں کو روکنے کے لیے؛ پیشگی اجازت کے بغیر کسی کو بھی ان علاقوں میں جانے کی اجازت نہیں ہوگی اور پرندوں کو دیکھنے میں دلچسپی رکھنے والے افراد کو مناسب اجازت حاصل کرنی چاہیے، اس اقدام سے محکمے کو جائز لوگوں کی شناخت میں مدد ملے گی۔ یا بغیر اجازت کے ان علاقوں میں داخل ہونے والے کو وائلڈ لائف پروٹیکشن ایکٹ 1972 کی خلاف ورزی تصور کیا جائے گا، اور ان کے خلاف ایکٹ کی دفعات کے تحت سخت کارروائی کی جائے گی‘‘۔عہدیداروں نے کشمیر میں قیام کے دوران ان ہجرت کرنے والے پرندوں کو محفوظ ماحول فراہم کرنے میں عوام سے تعاون کی خواہش کی ہے۔