کیپٹن اتل سومبرا یادگاری کرکٹ کپ فائنل کھیلاگیا | سٹار الیون چملواس، شاہِ اسرار کلب کو شکست دیکر فاتح قرار

محمد تسکین

بانہال// سپورٹس سٹیڈیم بانہال میں فوج کی طرف سے جاری کیپٹن اتل سومبرا میموریل کرکٹ کپ اپنے اختتام کو پہنچ گیا اور فائنل میچ میں سٹار الیون چملواس نے شاہ اسرار کرکٹ کلب کو چار رنوں سے شکست دیکر کیپٹن اتل سومبرا ٹرافی کو اپنے نام کر لی ۔اس فائنل مقابلے میں فاتح ٹیم سٹار الیون کو اتل سومبرا ٹرافی اور تیس ہزار روپئے کی نقد رقم سے نوازاگیا جبکہ ہارنے والی ٹیم کو ٹرافی اور دس ہزار روپئے کی رقم دی گئی۔اس موقع پر کمانڈنگ آفیسر بارہ راشٹریہ رائفلز کرنل وجے کمار پونیا ، ایس ڈی پی او بانہال منجیت سنگھ ، بی ایم او بانہال ڈاکٹر سید محمد اسماعیل ، سپورٹس آفیسر محمد سعاد اللہ میر کے علاوہ بھاری تعداد میں تماشائی فائنل مقابلے کو دیکھنے کیلئے آئے تھے۔مہمانان خصوصی نے اس ٹورنامنٹ میں بہتر کارکردگی دکھانے والے کھلاڑیوں میں بھی انعامات تقسیم کئے۔فوج کی طرف سے منعقدہ اس کرکٹ کپ میں ضلع را م بن سے تعلق سے رکھنے والی کل 32کرکٹ ٹیموں نے شرکت کی۔اس موقع پر فاتح اور رنر اپ ٹیم کے علاوہ وہاں موجود کھلاڑیوں نے بانہال میں فوج کی راشٹریہ رائفلز کا شکریہ ادا کرتے ہوئے کہا کہ فوج کی وجہ سے انہیں یہ پلیٹ فارم میسر ہوا ہے اور رام بن ، بانہال کے کھلاڑیوں کو اپنا ٹیلنٹ دکھانے کا موقع ملا ۔