अंधेरीत रहिवासी इमारतीला भीषण आग:फ्लॅट जळून खाक; अग्निशमन दलाच्या चार गाड्या दाखल, सुदैवाने जीवितहानी नाही

अंधेरीतील एका रहिवाशी इमारतीला भीषण आग लागली आहे. अंधेरी पश्चिममधील वीरा देसाई मार्गावरील शिंचन नावाच्या इमारतीत ही आग लागली. अग्निशमन दलाच्या गाड्या घटनास्थळी दाखल झाल्या असून आग विझविण्याचे प्रयत्न सुरू आहेत. पोलिस आणि अग्निशमन दलाच्या जवानांनी इमारतीतील लोकांना बाहेर काढले असून सुदैवाने जीवीतहानी झाली नाही. वीरा देसाई मार्गावरील शिंचन इमारतीच्या सहाव्या मजल्यावर ही आग लागली आहे. आज सकाळी साडेआठच्या सुमारास ही घटना घडली. घटनेची माहिती मिळताच अग्निशमन दलाच्या चार गाड्या घटनास्थळी दाखल झाल्या. पोलिस आणि अग्निशमन दलाच्या जवानांनी इमारतीतील सर्व रहिवाशांना सुखरुप बाहेर काढले. त्यामुळे कोणतीही जीवितहानी नाही, मात्र फ्लॅट जळून खाक झाला आहे. आग कशामुळे लागली याबाबत माहिती मिळू शकली नाही. अग्निशमन दलाच्या जवानांकडून आगीवर नियंत्रण मिळवण्याचे प्रयत्न सुरू आहेत.