अकोट शहरात हेल्मेट सक्ती लागू; 300 वाहन चालकांनी भरला दंड:पोलिस कर्मचाऱ्यांनाही भूर्दंड, हेल्मेट खरेदीसाठी चालकांची झुंबड‎

अपघाती मृत्यूंचे प्रमाण कमी करण्यासाठी पोलिस विभागाकडून शहरात हेल्मेट सक्ती मोहिम राबवण्याचा निर्णय घेतला असून १ फेब्रुवारीपासून विविध मार्गांवर ही कारवाई राबवली जात आहे. शहरात राबवलेल्या या कारवाईत विना हेल्मेट दुचाकी चालवणाऱ्या ३०० हून अधिक वाहन चालकांवर दंडात्मक कारवाई करण्यात आली. हेल्मेट न वापरणाऱ्यांमध्ये काही पोलिस कर्मचाऱ्यांचा देखील समावेश असून त्यांना सुद्धा दंड आकारण्यात आला आहे. दरम्यान मंगळवारी मुख्य मार्गावर अनेकांनी पोलिसांचा ताफा पाहून पर्यायी मार्गावरून जाण्यास प्राधान्य दिले तर काहींना पोलिसांचा अंदाज न आल्याने दंडात्मक कारवाईचा सामना करावा लागल्याचे चित्र पहावयास मिळाले. अकोटात गेल्या वर्षात अपघातांमध्ये विना हेल्मेट अनेक दुचाकीस्वारांचा मृत्यू झाला आहे. दरवर्षी विनाहेल्मेट व वाहतूक नियम न पाळल्याने नागरिकांचा अपघाती मृत्यू होत असतो. हे प्रमाण कमी करण्यासाठी न्यायालयानेही दुचाकी चालकांना हेल्मेट सक्ती केली आहे. मात्र हेल्मेट सक्तीबाबत असलेल्या कारवाई किंवा मोहिमेत सातत्य नसल्याने चालकांमध्येही हेल्मेट वापराबाबत जनजागृती होत नसल्याचे दिसले. त्यामुळे हेल्मेट वापराबाबत अजूनही उदासिनता पहावयास मिळते. दरम्यान जिल्हा पोलिस अधीक्षक यांनी फेब्रुवारीपासून हेल्मेट सक्ती संदर्भात मोहिम तीव्र करण्याच्या सूचना तालुक्यातील सर्वच पोलीस ठाण्यांना दिल्यानंतर १ फेब्रुवारीपासूनच अकोट शहरात हेल्मेट सक्तीची कडक अंमलबजावणी करण्यात आली. सकाळी छत्रपती शिवाजी महाराज चौक तर दुपारनंतर अकोला मार्गावर पोलिसांनी हेल्मेट न वापरणाऱ्या वाहन चालकांना थांबवून कारवाई केली. दुपारी या मार्गावर पोलिसांचा ताफा पाहून अनेकांनी मार्ग बदलून पळ काढला. तर काहींना पोलिसांच्या कारवाईचा सामना करावा लागला. अनेकांनी विविध कारणे देत कारवाईतून सुट देण्याची मागणी केली. मात्र पोलिसांनी ई चलन पद्धतीने कारवाई केली. त्यामुळे हेल्मेट घातले असते तर वेळ व पैसे दोन्हींची बचत झाली असती असाच काहीसा सुर कारवाई झालेल्या चालकांमध्ये उमटत होता. या कारवाईत नोकरदार वर्गापेक्षा विद्यार्थी, व्यावसायिक चालक अधिक प्रमाणात आढळून आले होते. हेल्मेट खरेदीस होते गर्दी अकोट शहरात सलग तिसऱ्या दिवशी हेल्मेट सक्तीची कठोर अंमलबजावणी करण्यात आली होती. शहरात रस्त्याच्या कडेला काही विक्रेत्यांनी हेल्मेट विक्रीसाठी आणले होते. कारवाईचा फास टाळण्यासाठी नागरिकांची हेल्मेट खरेदीसाठी झुंबड पाहायला मिळाली होती. ^नागरिकांना हेल्मेट वापरासंदर्भात शिस्त लागावी यासाठी ही कारवाई सुरूच राहील. हेल्मेट वापरणे फायद्याचे आहे. विना हेल्मेट दुचाकीस्वार व सह प्रवासी यांचे अपघात व त्यात मृत्युमुखी तसेच जखमी होणाऱ्यांच्या संख्येत मोठ्या प्रमाणावर वाढ होत आहे. त्यामुळे हेल्मेट सक्ती करण्यात आलेली आहे. स्वतःच्या सुरक्षेसाठी वाहनचालकांनी नियमित हेल्मेटचा वापर करावा.- अमोल माळवे, पोलिस निरीक्षक, अकोट शहर