आयएसएई फेलोशिपने डॉ. काळबांडे सन्मानित:५८ वे भारतीय कृषी अभियांत्रिकी संघटनेचे वार्षिक अधिवेशन

येथील डॉ. पंजाबराव देशमुख कृषी अभियांत्रिकी विद्याशाखेचे अधिष्ठाता डॉ. सुरेंद्र काळबांडे यांना आयएसएई फेलोशीप-२०२४ पारितोषिकाने सन्मानित करण्यात आले. परभणी येथील वसंतराव नाईक मराठवाडा कृषी विद्यापीठात ११ ते १४ नोव्हेंबर दरम्यान आयोजित ५८ वे भारतीय कृषी अभियांत्रिकी संघटनेचे वार्षिक अधिवेशन तसेच आंतरराष्ट्रीय परिसंवाद कार्यक्रम आयोजित करण्यात आला होता. या कार्यक्रमात कृषी व अभियांत्रिकी विद्याशाखेचे अधिष्ठाता तसेच नवीकरणीय ऊर्जा अभियांत्रिकी विभागप्रमुख डॉ. सुरेंद्र काळबांडे यांना ‘आयएसएई फेलोशिप-२०२४’ पारितोषिकाने सन्मानित करण्यात आले . कृषी अभियांत्रिकी क्षेत्रातील उत्कृष्ट योगदानाबद्दल हे पारितोषिक त्यांना मिळाले. यावेळी वसंतराव नाईक मराठवाडा कृषी विद्यापीठाचे कुलगुरू डॉ. इंद्रमणी, पद्मभूषण डॉ. आर. एस. परोदा, भारतीय कृषी अभियंता संघटनेचे अध्यक्ष डॉ. एस. एन. झा यांच्या हस्ते काळबांडे यांना या पुरस्काराचे वितरण करण्यात आले. याप्रसंगी राज्याचे कृषी शिक्षण व परिषदेचे महासंचालक रावसाहेब भागडे, माजी कुलगुरू डॉ. व्ही. एम. मायंदे व माजी कुलगुरू डॉ. ए. एस. ढवण उपस्थित होते. विद्यापीठाचे कुलगुरु डॉ. शरद गडाख यांनी डॉ. काळबांडे यांचे अभिनंदन केले आहे.