इचलकरंजीत आज धडाडणार उपमुख्यमंत्री फडणवीस यांची तोफ

इचलकरंजी : भाजपचे ज्येष्ठ नेते, महाराष्ट्राचे उपमुख्यमंत्री देवेंद्र फडणवीस यांची रविवारी इचलकरंजीत तोफ धडाडणार आहे. येथील थोरात चौकात सायंकाळी 6 वाजता फडणवीस हे विजय निर्धार सभेला संबोधित करणार आहेत, अशी माहिती भाजप शहराध्यक्ष पै. अमृत भोसले व प्रकाश दत्तवाडे यांनी दिली.

इचलकरंजी मतदारसंघातील महायुतीतील भाजपचे उमेदवार राहुल आवाडे यांच्या प्रचारार्थ उपमुख्यमंत्री फडणवीस यांची सभा होत आहे. सभेची जय्यत तयारी झाली असून उपमुख्यमंत्री फडणवीस काय बोलणार याकडे सर्वांचे लक्ष वेधले गेले आहे. या सभेसाठी खासदार धैर्यशील माने, आमदार प्रकाश आवाडे, भाजप प्रदेश उपाध्यक्ष सुरेश हाळवणकर, मतदारसंघ निरीक्षक आमदार शशिकला जोल्ले, समन्वयक अशोक स्वामी, भाजप जिल्हाध्यक्ष राजवर्धन नाईक-निंबाळकर, शिवसेना जिल्हाप्रमुख रवींद्र माने आदींसह महायुतीतील घटक पक्षांचे मान्यवर प्रतिनिधी उपस्थित असणार आहेत. या सभेसाठी मतदारसंघातील मतदार बंधू-भगिनींनी उपस्थित राहावे, असे आवाहन पै. भोसले व दत्तवाडे यांनी केले आहे.