उघड्यावर आलेल्या गरीबांची भागवताहेत भूक:अतिक्रमण काढल्याने हाल, शिख समाज, लिनेस क्लब व गुरू माँ संघटनेकडून पुढाकार‎

उघड्यावर पडलेल्या अतिक्रमणग्रस्त कुटुंबांला झोपायला व अन्न शिजवायलादेखील जागा उरली नाही. सर्वांवरच उपासमारीची वेळ आली असताना अशा अवस्थेत या सर्वांच्या मदतीला शहरातील ‘माणुसकीचे हात‘ मात्र सरसावले. पर्यायी व्यवस्था होईपर्यंत्त शहरातील शिख समाज, लिनेस क्लब व गुरू माँ संघटनेने सलग तीन दिवस जेवनाचे पॅकेट वाटून पिडितांना अन्नाचे घास भरवून माणुसकीचे दर्शन घडवले. श्रीरामपूर शहरातील अतिक्रमण कारवाईने गोंधवणी रोडची असंख्य कुटुंबे उद््वस्त झाली. मतदारांच्या मागे फिरणारे, चमकोगिरी करणारे पुढाऱ्यांचे कार्यकर्तेही घरात दडी मारून बसले आहेत. यावेळी या अतिक्रमणग्रस्त पीडितांच्या मदतीला धावून आलेल्यांकडे पाहून अजूनही माणुसकी शिल्लक असल्याची प्रचिती आली. श्रीरामपूर येथील शिख समाजाच्या वतीने गुरूद्वारामध्ये लंगर चालवला जातो. या संकटाची माहिती मिळताच गुरूद्वारामधून पहिल्या व दुसऱ्या दिवशी हजारांच्यावर जेवणाचे पाकिटे पीडितांपर्यंत पोहोचवण्यात आले आहेत. श्रीरामपूर शहरातील गोंधवणी रोड येथे गुरू माँ म्हणून ओळख असलेल्या मुमताज शाह यांना मानणारा मोठा वर्ग आहे. या संघटनेद्वारे डॉ. बाबासाहेब आंबेकडकर वसाहत, घरकूल वसाहत येथे राहणाऱ्या महिलांनी घरी स्वयंपाक करून अन्न पुरविले. तसेच शहरातील लिनेस क्लब श्रीरामपूर, मैथिली यांच्या वतीनेही तिसऱ्या दिवशी ५० कुटुंबांना जेवन वितरित करण्यात आले. यावेळी क्लबच्या अध्यक्षा डॉ. विना गंगवाल, सचिव माधुरी सोनवणे, खजिनदार प्रिया धाडिवाल, डॉ. अर्चना सोमाणी, डॉ. अचला अग्रवाल, श्रद्धा मिरीकर, शिवाणी शहा, ओम नारंग, डॉ. नीलेश गंगवाल आदी उपस्थित होते. या उपक्रमात लिनेसच्या सर्व सदस्यांसोबत माजी नगराध्यक्षा अनुराधा आदिक, डॉ. रिमा गोसावी, डॉ. सपना करवा, राणी पांडे आदींनी देखील लोकांना भोजन देण्यासाठी आर्थिक भार उचलला.