उमरा ग्रामपंचायतची कचरा गोळा करणारी घंटा गाडी बनली शोपीस

मोठा गाजावाजा करून स्मार्ट व्हिलेज अंतर्गत अकोट तालुक्यातील उमरा ग्रामपंचायतने कचरा घंटागाडी खरेदी केली. ज्याद्वारे गावातील कचरा गोळा करायचे काम काही दिवस सुरु होते. आता मात्र एक वर्षांपासून घंटा गाडी कुठेच कचरा जमा करायला दिसत नाही. सध्या घंटागाडी ही धूळ खात पडली असून ती खराब होण्यासाठी की शोपीस म्हणून ठेवली आहे ? असा प्रश्न नागरिकांना पडला आहे. ग्रामपंचायत प्रशासन गावात कोणत्याही प्रकारची स्वच्छता करताना दिसून येत नाही. त्यामुळे सर्वत्र दुर्गंधी सुटली आहे. यामुळे आरोग्य धोक्यात येण्याची शक्यता निर्माण झाली आहे. तसेच घाणीचे साम्राज्य वाढल्यामुळे डासांचे प्रमाणही मोठ्या प्रमाणात वाढले आहे. तसेच कचरा गाडी फिरत नाही . त्यामुळे ठिकठिकाणी गावात अस्वच्छता निर्माण होत असून विविध रोगराई तसेच आजारांना आमंत्रण दिले जात आहे. स्थानिक उमरा ग्रामपंचायतीने याकडे लक्ष देण्याची मागणी होत आहे. भविष्यात याचे दुष्यपरिणाम होऊ शकतात. घंटा गाडी ही धूळ खात पडली असून ही गाडी सध्या गावाच्या कडेला फक्त एक स्वच्छता अभियानाचे जाहिरात करण्यासाठी शोपीस म्हणून ठेवलेली आहे, असे चित्र सध्या दिसून येत आहे. गावाच्या स्वच्छतेकडे लक्ष देण्याची मागणी होतेय गावामध्ये ठिकठिकाणी कचऱ्याचे ढीग पडलेले दिसून येतात. नाल्या, गटारांची सफाई वारंवार होत नाही. नाल्यांच्या काठावरील गवत साफ होत नसल्यामुळे सर्वत्र दुर्गंधी पसरली आहे. अशा प्रकारामुळे नागरिकांचे आरोग्य धोक्यात येण्याची शक्यता आहे. घाणीच्या साम्राज्याला दूर करण्याकरिता प्रशासनाने लक्ष देण्याची मागणी नागरिकांकडून करण्यात येत आहे. - प्रशांत खेडकर, सामजिक कार्यकर्ते, उमरा