उरुळी देवाचीत भीषण अपघात:टँकरच्या चाकाखाली चिमुकला चिरडला; चालकाविरुद्ध गुन्हा दाखल

उरुळी देवाची परिसरात एक हृदयद्रावक घटना घडली असून, एका एक वर्षीय चिमुकल्याचा पाण्याच्या टँकरच्या चाकाखाली चिरडून मृत्यू झाला. हडपसर-सासवड रस्त्यावरील या दुर्दैवी घटनेत कृष्णा राहुल महतो या चिमुकल्याचा जागीच मृत्यू झाला. घटनेची माहिती अशी की, मजुरी करणारे महतो दाम्पत्य उरुळी देवाची येथील एका भंगार माल दुकानात काम करतात आणि दुकानाच्या पोटमाळ्यावर राहतात. घटनेच्या दिवशी त्यांचा एक वर्षीय मुलगा कृष्णा दुकानासमोरील मोकळ्या जागेत चटईवर खेळत होता. त्याची आई बबीतादेवी दैनंदिन कामात व्यस्त असताना अचानक तेथून जाणाऱ्या पाण्याच्या टँकरच्या चाकाखाली तो सापडला. अपघातानंतर टँकरचालक विजयकुमार बालाजी फड (३२, खांदवेनगर, लोहगाव) घटनास्थळावरून पळून गेला. मात्र, पोलिसांनी त्वरित कारवाई करून त्याला ताब्यात घेतले. बबीतादेवी महतो (२२) यांच्या फिर्यादीवरून हडपसर पोलिस ठाण्यात टँकरचालकाविरुद्ध हलगर्जीपणाचा गुन्हा दाखल करण्यात आला आहे. या दुर्दैवी घटनेने परिसरात शोककळा पसरली असून सहायक पोलीस निरीक्षक अमित शेटे यांच्या नेतृत्वाखाली पुढील तपास सुरू आहे.