ऊस वाहतूक करणाऱ्या ट्रॅक्टरने धडकेत विद्यार्थ्याचा मृत्यू:वसमत ग्रामीण पोलिस ठाण्यात गुन्हा दाखल

वसमत तालुक्यातील पूर्णा कारखाना जिल्हा परिषद शाळेत जाणाऱ्या विद्यार्थ्याला ऊसाची वाहतूक करणाऱ्या ट्रॅक्टरने धडक दिल्याने विद्यार्थ्याचा मृत्यू झाला असून या प्रकरणी वमसत ग्रामीण पोलिस ठाण्यात शुक्रवारी ता. 7 रात्री उशीरा गुन्हा दाखल झाला आहे. पोलिसांनी फरार ट्रॅक्टर चालकाचा शोध सुरु केला आहे. पोलिसांनी दिलेल्या माहितीनुसार, वसमत तालुक्यातील पूर्णा कारखाना येथील रहिवासी असलेला ओम अनिल गिरी (10) हा कारखाना येथील जिल्हा परिषद शाळेत इयत्ता पाचवी वर्गात शिक्षण घेतो. त्याचे आई, वडिल रोजमजूरी करतात. नेहमी प्रमाणे ओम हा त्याच्या सायकलवर गुरुवारी ता. 6 सकाळी शाळेत जात होती. यावेळी कारखाना रोडवर ऊसाने भरलेल्या ट्रॅक्टरने (एमएच-38-बी-5361) त्याच्या सायकलला धडक दिली. यामध्ये ओम याचे सायकलवरील नियंत्रण सुटले अन तो ट्रॅक्टरच्या चाकाखाली सापडला. यामध्ये तो गंभीर जखमी झाला. अपघातानंतर ट्रॅक्टर चालकाने घटनास्थळावरून पळ काढला. या अपघाताची माहिती मिळताच वसमत ग्रामीण पोलिस ठाण्याचे सहाय्यक पोलिस निरीक्षक गजानन बोराटे, जमादार विजयकुमार उपरे, व्ही. जी. खंदारे यांच्या पथकाने तातडीने घटनास्थळी भेट दिली. पोलिस व गावकऱ्यांनी गंभीर जखमी ओम यास उपचारासाठी वसमतच्या उपजिल्हा रुग्णालयात दाखल केले. मात्र त्यांची प्रकृती गंभीर असल्याने त्याच्यावर प्राथमिक उपचार करून पुढील उपचारासाठी नांदेडला हलविले. मात्र नांदेड येथे उपचार सुरु होण्यापुर्वीच त्याचा मृत्यू झाला. या प्रकरणी त्याची आई सुमीत्रा गिरी यांनी दिलेल्या तक्रारीवरून वसमत ग्रामीण पोलिसांनी ट्रॅक्टर चालकाविरुध्द गुन्हा दाखल केला असून पोलिसांनी त्याचा शोध सुरु केला आहे.