एकेरी वाहतुकीमुळे ट्रक-कारची धडक, पती-पत्नी जागीच ठार

राहुरी मालवाहतूक ट्रक व कारच्या समोरासमोर झालेल्या धडकेत पती-पत्नी जागीच ठार झाले. ही घटना शुक्रवारी सकाळी सातच्या सुमारास नगर-मनमाड राज्य महामार्गावरील गुहा (ता. राहुरी) हद्दीतील सेल पेट्रोल पंपासमोर घडली. दीपक म्हसे व माया म्हसे, रा. ममदारपूर, बाभळेश्वर ता. राहाता, असे मृत पती-पत्नीचे नाव आहे. बाभळेश्वर येथील म्हसे दाम्पत्य आपल्या एमएच १४ एव्ही ३३७२ या कारने शिर्डीकडे जात होते. गुहा हद्दीतील सेल पेट्रोल पंपासमोरील वनवे रस्ता असल्याने नगरच्या दिशेला जाणारा मालवाहतूक ट्रक व कार ही दोन्ही वाहने समोरासमोर येऊन एकमेकाला धडकली. अपघातात कारच्या पुढील भागाचा चक्काचूर झाल्याने ड्रायव्हर शिटवर बसलेले दीपक म्हसे व शेजारी बसलेल्या माया म्हसे हे पती-पत्नी जागीच ठार झाले. अपघाताची भीषण घटना घडताच नगर-मनमाड राज्य महामार्गावर अन्य वाहनचालकांची घटनास्थळी मोठी गर्दी जमली होती. हा अपघात एकेरी वाहतूक चालणाऱ्या रस्त्यावर घडल्याने नगर-मनमाड राज्य महामार्गावरील वाहतूक काहीकाळ ठप्प झाली होती. घटनास्थळी उपस्थित असलेल्या नागरिकांनी कारमध्ये दबलेले म्हसे पती-पत्नीचे मृतदेह बाहेर काढण्यास मदत केली. मालवाहतूक ट्रक व कारच्या अपघातात कारची अशी दूरवस्था झाली. छाया : राजेंद्र वाडेकर. रस्त्यावर दररोज घडताहेत अपघात नगर-मनमाड राज्य महामार्गावरील गुहा हद्दीत रस्त्याचे काम रखडल्याने एकेरी वाहतूक सुरू आहे. शिर्डीकडून नगरकडे व नगरकडून शिर्डीकडे जाणारी वाहनासाठी काही ठिकाणी खराब रस्ता असल्याने अपघाताच्या लहान मोठ्या घटना रोजच घडत आहेत, असे गुहा येथील ग्रामस्थ भगवान वाबळे यांनी सांगितले. मृत दीपक म्हसे मृत माया म्हसे