कल्याणमध्ये इमारतीला भीषण आग:13 व्या मजल्यावरील फ्लॅटची राखरांगोळी, सुदैवाने जीवितहानी टळली

कल्याण येथील आधारवाडी परिसरातील असलेल्या व्हर्टेक्स हाऊसिंग सोसायटीमध्ये एका फ्लॅटला भीषण आग लागल्याची घटना समोर आली आहे. या आगीत संपूर्ण फ्लॅट जळून खाक झाला आहे. या घटनेची माहिती मिळताच केडीएमसी अग्निशमन दलाची गाडी तातडीने घटनास्थळी दाखली झाली आहे. सुदैवाने या दुर्घटनेत कोणतीही जीवितहानी झालेली नाही. आधारवाडी परिसरातील असलेल्या व्हर्टेक्स हाऊसिंग सोसायटीमधल्या एका इमारतीच्या 13 व्या मजल्यावर असलेल्या एका फ्लॅटला आग लागली. आग लागल्यानंतर वेळीच घरातील सदस्य घरातून बाहेर पडल्याने मोठी जीवितहानी टळली. मात्र, या आगीत संपूर्ण फ्लॅट अक्षरशः जळून खाक झाला आहे. आग लागल्याचे समजताच अग्निशाम दल तातडीने घटनास्थळी दाखल झाले. ही आग नेमकी कशामुळे लागली, याचे कारण अद्याप समजू शकले नाही. मात्र या घटनेमुळे एकच खळबळ उडाली असून सोसायटीमधील नागरिकांमध्ये भीतीचे वातावरण पसरले आहे. या घटनेनंतर सोसायटीबाहेर वाहतुकीची देखील मोठ्या प्रमाणात कोंडी झाली तसेच बघ्यांची देखील मोठ्या प्रमाणात गर्दी जमली होती. तसेच फ्लॅट उंचावर असल्याने आगीला आटोक्यात आणण्यात देखील अडथळे येत आहेत. अग्निशमन दलाकडून आग आटोक्यात आणण्याचे प्रयत्न सुरू आहेत. दरम्यान, मुंबई, ठाणे तसेच पुण्यात देखील उंच इमारती उभ्या केल्या जात आहेत. 100 मजली इमारत देखील आता मुंबईत उभारत आहे. मात्र या इमारतींमध्ये राहताना प्रामुख्याने अनेकदा सुरक्षेचा प्रश्न निर्माण झाला आहे. आगीची घटना किंवा तत्सम दुर्घटना घडल्यास सुरक्षेचा उपाय काय, असा प्रश्न पुन्हा एकदा उपस्थित झाला आहे.