कुकडी प्रकल्पातील उपसा सिंचन योजनांसाठी नवा आराखडा:भिमाशंकर मंदिर विकासासाठी 148 कोटींचा प्रकल्प, उपमुख्यमंत्री अजित पवार यांचे निर्देश

पुणे जिल्ह्यातील भिमाशंकर तीर्थक्षेत्राच्या विकासासाठी महत्त्वपूर्ण निर्णय घेण्यात आला आहे. विधानभवनात झालेल्या बैठकीत उपमुख्यमंत्री अजित पवार यांनी भिमाशंकर मंदिर परिसराच्या विकासाबाबत महत्त्वपूर्ण सूचना दिल्या. पंढरपूर, शिर्डी आणि महाबळेश्वर देवस्थानाच्या धर्तीवर भिमाशंकर मंदिर परिसराचा विकास करण्याचे निर्देश त्यांनी दिले. भिमाशंकर विकास आराखड्यासाठी एकूण 148 कोटी रुपयांचा निधी मंजूर करण्यात आला होता, त्यापैकी आतापर्यंत 77 कोटी रुपयांचा खर्च झाला आहे. जिल्हाधिकारी जितेंद्र डूडी यांनी सादर केलेल्या प्रस्तावानुसार, उर्वरित कामे अधिक एकात्मिक पद्धतीने करण्याची आवश्यकता व्यक्त केली. याच बैठकीत कुकडी प्रकल्पांतर्गत डिंभे धरणातून कळमजाई उपसा सिंचन योजनेच्या सुधारित प्रशासकीय मान्यतेसाठी चर्चा झाली. उपमुख्यमंत्री पवार यांनी पाटबंधारे विभागाला राज्यस्तरीय तांत्रिक मान्यता समितीकडे प्रस्ताव सादर करण्याचे निर्देश दिले. मान्यता मिळाल्यानंतर आवश्यक निधीची तरतूद करण्यात येणार आहे. बैठकीला म्हाडाच्या पुणे मंडळाचे अध्यक्ष शिवाजीराव आढळराव पाटील, आमदार दिलीप वळसे पाटील, पुणे विभागीय आयुक्त डॉ. चंद्रकांत पुलकुंडवार, जिल्हा परिषदेचे मुख्य कार्यकारी अधिकारी गजानन पाटील, कृष्णा खोरे विकास महामंडळाचे कार्यकारी संचालक अतुल कपोले यांच्यासह अन्य वरिष्ठ अधिकारी उपस्थित होते.