कृत्रिम बुद्धिमत्ता व्यवस्थापन क्षेत्रात क्रांती घडवणार:फेबेक्स 2025 परिषदेत तज्ज्ञांचा एकसूर; मशीन मानवी निर्णय क्षमतेला टक्कर देणार

पुण्यात फेबर इंफायनाइट कन्सल्टींगतर्फे आयोजित 'फेबेक्स २०२५' या आंतरराष्ट्रीय परिषदेत कृत्रिम बुद्धिमत्तेच्या (एआय) वाढत्या प्रभावावर चर्चा झाली. कायनेको उद्योग समूहाचे संस्थापक आणि व्यवस्थापकीय संचालक शेखर सरदेसाई यांनी एआयमुळे मशीन अधिक हुशार होत असून, ती मानवी निर्णय क्षमतेला टक्कर देऊ शकते, असे मत व्यक्त केले. परिषदेच्या उद्घाटन सोहळ्यास महाराष्ट्राचे उच्च व तंत्र शिक्षण मंत्री चंद्रकांत पाटील आणि उद्योगमंत्री उदय सामंत यांनी दृकश्राव्य माध्यमातून सहभाग नोंदवला. उदय सामंत यांनी डिजिटल परिवर्तन आणि शाश्वततेसाठी नवीन पिढीला सक्षम करण्याच्या उद्देशाने ही परिषद महत्त्वपूर्ण ठरेल, असे सांगितले. परिषदेत तंत्रज्ञानातील प्रगती, शाश्वत जीवनपद्धती आणि कार्यक्षमता या विषयांवर विशेष भर देण्यात आला. एम्बी उद्योग समूहाचे मकरंद अपलवार यांनी इंडस्ट्री ४.० आणि पर्यावरण, सामाजिक आणि प्रशासन पद्धतींच्या महत्त्वावर प्रकाश टाकला. कार्यक्रमात जागतिक दर्जाच्या उद्योगपती आणि व्यवस्थापकांचा विशेष सत्कार करण्यात आला. फेबर इंफायनाइट कन्सल्टींगचे संचालक आकाश बोरसे, जलय पांड्या आणि विशाल कुलकर्णी यांच्यासह अनेक मान्यवर या परिषदेस उपस्थित होते. एआयमुळे मनुष्यबळाचे श्रम वाचवून अधिक प्रभावी पद्धतीने काम होत असल्याचेही या वेळी नमूद करण्यात आले.