‘कोयना’ वीजनिर्मिती तूट भरून काढण्याची संधी

पाटण : गतवर्षी कोयना धरणातील पाण्याअभावी पश्चिम वीजनिर्मितीला कात्री लागली होती. यावर्षी मुबलक पाऊस व पाणीसाठा असतानाही आतापर्यंतच्या तांत्रिक आठ महिन्यांत गतवर्षीच्याही तुलनेत कमी वीजनिर्मिती झाली आहे. या आठ महिन्यांत चार जलविद्युत प्रकल्पातून 1430.498 दशलक्ष युनिट इतकीच आतापर्यंत वीजनिर्मिती झाली आहे.

गतवर्षीच्या तुलनेत पाणी वापर कमी झाल्याने तब्बल 184.401 दशलक्ष युनिट कमी वीजनिर्मिती झाल्याची तांत्रिक आकडेवारी आहे. निदान उर्वरित चार महिन्यांत तरी या मुबलक पाण्याचा वापर करत जादा वीजनिर्मिती व राज्य महसुलात कोट्यवधीची अतिरिक्त भर टाकावी अशा सार्वत्रिक अपेक्षा व्यक्त होत आहेत.

या जलवर्षात आतापर्यंत आठ महिन्यांत कोयना जलविद्युत प्रकल्पात पश्चिमेकडे 29.25 टीएमसी पाण्यावर 1346.453 दशलक्ष युनिट वीजनिर्मिती झाली. गतवर्षी 33.66 टीएमसीवर 1536.489 दशलक्ष युनिट वीजनिर्मिती झाली होती. यावेळी तुलनात्मक पश्चिमेकडे 4.41 टीएमसी पाणी वापर कमी झाल्याने 190.036 दशलक्ष युनिट कमी वीजनिर्मिती झाली आहे.

पूर्वेकडे कोयना धरण पायथा वीजगृहातून वीजनिर्मिती करून ते पाणी सिंचनासाठी कोयना नदीपात्रात सोडण्यात येते. आतापर्यंत सिंचनासाठी सोडलेल्या 8.33 व पूरकाळातील 9.10 अशा एकूण 17.43 टीएमसी पाण्यावर 84.045 दशलक्ष युनिट वीजनिर्मिती झाली. गतवर्षी सिंचनासाठी सोडलेल्या 15.34 व पूरकाळातील 2.52 अशा 17.56 टीएमसी पाण्यावर 78.410 दशलक्ष युनिट वीजनिर्मिती झाली होती. तुलनात्मक यावर्षी 0.13 टीएमसी पाणी वापर कमी झाला असला, तरी 5.635 दशलक्ष युनिट ज्यादा वीजनिर्मिती झाली आहे.

चारही जलविद्युत प्रकल्पांचा विचार करता आतापर्यंत आठ महिन्यांत एकूण 46.68 टीएमसी पाण्यावर 1430.498 दशलक्ष युनिट वीजनिर्मिती झाली. गतवर्षी 51.22 टीएमसी पाण्यावर 1614.899 दशलक्ष युनिट वीजनिर्मिती झाली होती. गतवर्षीच्या तुलनेत आतापर्यंत 4.54 टीएमसी पाणी वापर कमी झाल्याने 184.401 दशलक्ष युनिट कमी वीजनिर्मिती झाली असल्याचे आकडेवारीवरून दिसून येत आहे.