खडकवासला परिसरातील कुडजे रस्त्यावर भीषण अपघात:पिकअप वाहनाच्या धडकेत दुचाकीस्वाराचा दुर्देवी अंत

भरधाव जात असलेल्या पिकअप वाहनाच्या धडकेत दुचाकीस्वाराचा दुर्देवी रित्या मृत्यू झाल्याची घटना खडकवासला परिसरातील कुडजे रस्त्यावर घडली. याप्रकरणी उत्तमनगर पोलिसांनी अज्ञात वाहनचालकाविरुद्ध गुन्हा दाखल केला आहे. विठ्ठल गणपत ढमढेरे (वय ५३, रा. खडकवाडी, ता. हवेली) असे मयत झालेल्या दुचाकीस्वाराचे नाव आहे. याप्रकरणी अज्ञात वाहनचालकाविरुद्ध गुन्हा दाखल करण्यात आला. याबाबत ढमढेरे यांच्या मुलाने उत्तमनगर पोलीस ठाण्यात तक्रार दिली आहे. दुचाकीस्वार विठ्ठल ढमढेरे शुक्रवारी रात्री अकरा वाजण्याच्या सुमारास कुडजे रस्त्याने घरी निघाले होते. कुडजे रस्त्यावर मालवाहू पिकअप गाडीने दुचाकीस्वार ढमढेरे यांना धडक दिली. अपघातानंतर घटनास्थळी न थांबता पिकअप वाहनचालक पसार झाला. अपघातात गंभीर जखमी झालेल्या ढमढेरे यांना तातडीने खासगी रुग्णालयात दाखल करण्यात आले. उपचारांपूर्वीच त्यांचा मृत्यू झाला.पसार झालेल्या वाहनचालकाचा शोध घेण्यात येत आहे. पोलीस उपनिरीक्षक संतोष कदम पुढील तपास करत आहेत. एसटी प्रवासी महिलेकडील दागिने चोरीला एसटी प्रवासी महिलेच्या बॅग मधून एक लाख २० हजारांचे दागिने चोरून नेण्यात आल्याची घटना उघडकीस आली.याबाबत एका ४२ वर्षीय महिलेने स्वारगेट पोलीस ठाण्यात फिर्याद दिली आहे. तक्रारदार महिला मूळच्या पिंपरीतील जुनी सांगवी परिसरात राहायला आहेत. त्या पंढरपूरला गेल्या होत्या. पंढरपूरहून त्या एसटी बसने स्वारगेट एसटी स्थानकात उतरल्या. त्यांनी पिशवीची पाहणी केली. तेव्हा बॅग मधून सोन्याचे दागिने चोरीला गेल्याचे लक्षात आले. सहायक पोलीस निरीक्षक राहुल कोलंबीकर पुढील तपास करत आहेत. स्वारगेट, शिवाजीनगर एसटी स्थानकाच्या आवारातून प्रवासांकडील दागिने अज्ञात चोरट्यांनी चोरून नेल्याच्या घटना वारंवार घडत आहेत.