विहामांडवा परिसरात गावठी कट्टा घेऊन फिरणाऱ्याला अटक

पैठण : पैठण तालुक्यातील विहामांडवा परिसरात गावठी कट्टा काडतूस घेऊन फिरणाऱ्या एका सराईत गुन्हेगाराला गुन्हे शाखा आणि पाचोड पोलिसांनी शनिवारी रोजी सापळा लावून अटक केली. सदरील व्यक्तीने गावठी कटटा काडतूस कुठून आणि कशासाठी आणली याबाबत पोलिसांनी तपास सुरू केला आहे.

अधिक माहिती अशी की, तालुक्यातील पाचोड ते विहामांडवा रोडवर असलेल्या जगदंबा हॉटेल जवळ एक अनोळखी व्यक्ती गावठी कटटा काडतूससह फिरत असल्याबाबतची गोपनीय माहिती स्थानिक गुन्हा शाखेच्या पथकाला मिळाल्याने शनिवारी स्थानिक गुन्हे शाखेचे पोलीस निरीक्षक सतीश वाघ, वाल्मीक निकम, शिरसाट, वाघ, घाटेशवर, तरमाळे, तांदळे यांनी सगळी माहिती पाचोड पोलीस ठाण्याचे सहाय्यक पोलिस निरिक्षक शरदचंद्र रोडगे, विहामाडवा पोलीस चौकीचे पोलीस उपनिरीक्षक राम बाराहाते, जमादार किशोर शिंदे यांना दिली.

पोलिसांनी पाचोड रोडवरील विहामांडवा परिसरातील हॉटेल जगदंबा येथे सापळा लावून संशयास्पद फिरत असलेल्या संतोष रायभान भोसले (रा. खंडाळा गायरान वस्ती ता.पैठण) या सराईत गुन्हेगाराला ताब्यात घेतले. त्याच्याजवळील एक गावठी कट्टा काडतूस हस्तगत करून गुन्हा दाखल करण्यात आला. सदरील आरोपीने गावठी कट्टा कुठून आणला आणि कशासाठी आणला यासंदर्भात पुढील तपास ग्रामीण पोलीस अधीक्षक डॉ. विनयकुमार राठोड, अप्पर पोलीस अधीक्षक सुनिल लांजेवार, उपविभागीय पोलिस अधिकारी डॉ. सिद्धेश्वर भोरे यांच्या मार्गदर्शनाखाली पोलीस उपनिरीक्षक राम बाराहाते हे करीत आहे.