खोट्या टीसी बनवून जन्म प्रमाणपत्र बनवणारे पोलिसांच्या रडारवर‎:12 जणांवर गुन्हे दाखल; सोमय्या यांनी दिली आणखी 16 नावे

अकोल्यात बांगलादेशी घुसखोर असल्याचा आरोप भाजपचे नेते किरीट सोमय्या यांनी केला होता. त्यानंतर रामदासपेठ पोलिसांनी खोट्या टीसी (शाळा सोडल्याचे प्रमाणपत्र) बनवून जन्माचे दाखले बनवण्याचा प्रयत्न करणाऱ्या आणि बनवणाऱ्या १२ जणांविरुद्ध गुन्हे दाखल केले आहेत. या सर्वांनीच टीसीमध्ये खाडाखोड केल्याचे समोर आले आहे. हे सर्व आता पोलिसांच्या रडारवर आहेत. रामदासपेठ पोलिस ठाण्यात अकोल्याच्या नायब तहसीलदार स्वप्नाली काळे यांनी तक्रार दिली. त्यात त्यांनी १२ जणांनी जन्म प्रमाणपत्र मिळवण्यासाठी खोट्या टीसी दिल्याचा आरोप केला आहे. त्यानुसार पोलिसांनी त्या सर्व १२ जणांविरुद्ध गुन्हे दाखल केले. त्यापैकी तीन जणांना अटक केली आहे. सर्वांनीच बनावट टीसीचा वापर केल्याने किरीट सोमय्या यांच्या आरोपाला बळ आले आहे. गुरुवारी पुन्हा किरीट सोमय्या यांनी उपविभागीय पोलिस अधिकारी सतीश कुलकर्णी यांची भेट घेतली. त्यांना शहरात बांगलादेशी अधिवास करत असल्याचे पुरावेही दिले आहेत. सोमय्या यांच्या तक्रारीवरून रामदासपेठ पोलिसांनी त्यांचे बयाण नोंदवले. यावेळी सोमय्या यांनी आणखी १६ संशयितांचे नावे पोलिसांना दिली आहेत की ज्यांनी बनावट टीसी बनवून जन्म प्रमाणपत्रासाठी अर्ज केले होते. महसूल विभागाने सर्व आरोपीचे टीसीची त्या त्या शाळांमध्ये जावून चौकशी केली. त्यावेळी त्यांना धक्कादायक बाबी समोर आल्या आहेत. कुणाच्या नावांमध्ये खाडाखोड तर कुणाच्या जन्मतारखेमध्ये खाडाखोड दिसून आली. तसेच शाळेतील मूळ टीसी आणि आरोपींकडील टीसीत बरेच बदल दिसून आले. त्या सर्वांचीच तक्रार पोलिस ठाण्यात करण्यात आली आहे. नायब तहसीलदारांच्या तक्रारीवरून १२ जणांविरुद्ध गुन्हा दाखल केला आहे. तिघांना अटक केली आहे. सखोल चौकशी सुरू आहे. आरोपींनी जन्म प्रमाणपत्रासाठी बनावट टीसीचा वापर केल्याचे दिसून येत आहे. अनेक टीसीवर खाडाखोड आहे. आरोपी कशासाठी जन्म प्रमाणपत्र बनवत आहेत, त्यांचा उद्देश काय हा तपासाचा भाग आहे. त्यामुळे गुन्हा दाखल झालेले आरोपींना बांगलादेशी सध्यातरी म्हणू शकत नाही, तपासाअंती ते समोर येईल. - मनोज बहुरे, ठाणेदार रामदासपेठ