गँगस्टर बिश्नोई टोळीच्या 'हिटलिस्ट'वर आता श्रद्धा वालकर हत्‍या प्रकरणातील आरोपी आफताब?

पुढारी ऑनलाईन डेस्‍क : आमदार बाबा सिद्दीकी हत्या प्रकरणातील संशयित आरोपी शुभम लोणकर हा लॉरेन्स बिश्नोई टोळीसाठी काम करत असल्याचे पोलीस तपासात उघड झाले आहे. तसेच श्रद्धा वालकरच्या हत्या प्रकरणातील आरोपी आफताब पूनावाला हा लॉरेन्स बिश्नोईच्या टोळीच्या हिटलिस्टवर असून, शुभम लोणकर हा पूनावालाची माहिती गोळा करण्याचा प्रयत्न करत असल्‍याची माहिती तपासात समोर आली आहे.

एका रिपोर्टनुसार, बाबा सिद्दीकी हत्‍या प्रकरणी मुंबई गुन्हे शाखेने मोस्‍ट वाँटेड २४ संशयितांना अटक केली आहे. या प्रकरणातील दोन मोस्ट वाँटेड आरोपी झीशान अख्तर आणि शुभम लोणकर अद्याप फरार आहेत. पुण्यात राहणाऱ्या शुभम लोणकरला अटक करण्यासाठी मुंबई गुन्हे शाखा व्यापक प्रयत्न करत आहे. आता पोलीस तपासात श्रद्धा वालकर प्रकरणातील आरोपी आफताब पूनावाला हाही लॉरेन्स बिश्नोई टोळीच्या हिटलिस्‍टवर असल्‍याचे तपासात समोर येत आहे. कारण लोणकर हा पूनवाला याची माहिती गोळा करत असल्‍याचे , बाबा सिद्दीकी हत्‍या प्रकरणातील तपासात समोर आले आहे.

सूत्रांनी दिलेल्या माहितीनुसार, जानेवारी २०२४ मध्‍ये अकोला पोलिसांनी शुभम लोणकर याला शस्त्रास्त्र कायद्याच्या गुन्ह्यात अटक केली होती. यावेळी त्‍याच्‍याकडून ती शस्त्रेही जप्त करण्‍यात आली होती. शुभम लोणकर याचे गँगस्टर लॉरेन्स बिश्नोई आणि त्याचा भाऊ अनमोल बिश्नोई यांच्याशी संबंध असून तो बंदुकीच्या तस्करीत सहभागी असल्याचे अकोला पोलिसांच्या अहवालातून स्पष्ट झाले आहे. या तपासात शुभम लोणकर याने अनमोल बिश्नोई याच्या मोबाईलवर व्हॉट्सॲप बिझनेसच्या माध्यमातून संपर्क साधल्याचे समोर आले आहे. शुभम लोणकर हा बिश्नोई टोळीसाठी काम करत असल्याची पुष्टी मिळाली आहे.